ಮಂಗಳೂರು : 33 ವರ್ಷಗಳ ನಿರಂತರ ಅಧಿಕಾರ… 1 ಲಕ್ಷ ಕೋಟಿಗೂ ಅಧಿಕ ಅನುದಾನ ತಂದಿರುವ ಹಾಲಿ ಸಂಸದರ ಸಾಧನೆ. ಇನ್ನು ದೇಶ ಸೇವೆ ಮಾಡಿರೋ ಹೆಮ್ಮೆಯ ಸುಪುತ್ರ… ಹಿಂದುತ್ವಕ್ಕೆ ಜೀವನ ಮುಡಿಪಾಗಿಟ್ಟಿರುವ ಅಪ್ಪಟ ದೇಶ ಪ್ರೇಮಿ ಅಭ್ಯರ್ಥಿ. ಇದಿಷ್ಟು ಇದ್ರೂ ಈ ಬಾರಿ ಚುನಾವಣೆ ಗೆಲ್ಲೋದು ಅಷ್ಟೊಂದು ಸುಲಭ ಅಲ್ಲ ಅನ್ನೋ ಆತಂಕ ಜಿಲ್ಲಾ ಬಿಜೆಪಿಯಲ್ಲಿ ಇದೆಯಾ ? ಮತದಾರರಲ್ಲಿ ಇಂತಹ ಒಂದು ಚರ್ಚೆಗೆ ಸ್ವತಹ ಬಿಜೆಪಿ ಪಕ್ಷವೇ ಎಡೆ ಮಾಡಿ ಕೊಟ್ಟಿದೆ.

ಹವಾ ಕ್ರಿಯೇಟ್ ಮಾಡಿದ್ದಾರ ಪದ್ಮರಾಜ್ ಪೂಜಾರಿ..?

ಹಿಂದುತ್ವದ ಭದ್ರ ಕೋಟೆಯಲ್ಲಿ ಬಿಜೆಪಿ ಪಕ್ಷದಿಂದ ಯಾರೇ ಸ್ಪರ್ಧೆ ಮಾಡಿದ್ರೂ ಗೆದ್ದೇ ಗೆಲ್ತಾರೆ ಅಂತಿದ್ದ ಬಿಜೆಪಿ ಪಾಳಯದಲ್ಲಿ ಈ ಬಾರಿ ಅಂತಹ ಗೆಲುವಿನ ಉತ್ಸಾಹ ಕಂಡು ಬರ್ತಾ ಇಲ್ಲ. ದಕ್ಷಿಣ ಕನ್ನಡ ಲೋಕಸಭಾ ಕ್ಷೇತ್ರದಲ್ಲಿ ಸದ್ಯದ ಮಟ್ಟಿಗೆ ಹವಾ ಎಬ್ಬಿಸಿರೋ ಕೈ ಅಭ್ಯರ್ಥಿ ಆರ್ ಪದ್ಮರಾಜ್‌ ಮುಂದೆ, ಬಿಜೆಪಿ ಅಭ್ಯರ್ಥಿ ಮಂಕಾಗಿದ್ದಾರೆ ಅಂತ ಚರ್ಚೆಗಳು ನಡಿತಾ ಇದೆ. ಇಂತಹ ಚರ್ಚೆಗೆ ಪೂರಕವೆಂಬಂತೆ ಕ್ಷೇತ್ರದಲ್ಲಿ ಬಿಜೆಪಿ ಮೋದಿ ಹವಾ ಕ್ರಿಯೇಟ್ ಮಾಡಲು ಹೊರಟಿರೋದು ಅನುಮಾನ ಮೂಡಿಸಿದೆ.

4 ಲಕ್ಷದಿಂದ ಗೆಲ್ಲುತ್ತೇವೆ ಅಂತಿದ್ದವರಿಗೆ ಆತಂಕ ಯಾಕೆ ?

ಜಿಲ್ಲೆಯಲ್ಲಿ ಈ ಬಾರಿ ನಾಲ್ಕು ಲಕ್ಷದ ಮತಗಳ ಅಂತರದಿಂದ ಗೆಲ್ತೇವೆ ಅನ್ನೋ ದೃಢ ವಿಶ್ವಾಸವನ್ನೂ ಬಿಜೆಪಿ ಪಾಳಯ ವ್ಯಕ್ತಪಡಿಸಿದೆ. ಇನ್ನು ಇತ್ತೀಚೆಗಷ್ಟೇ ಶಿವಮೊಗ್ಗದಲ್ಲಿ ನಡೆದಿದ್ದ ಮೋದಿ ಸಮಾವೇಶದಲ್ಲಿ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಬ್ರಿಜೇಶ್ ಚೌಟ್‌ ವೇದಿಕೆ ಹಂಚಿಕೊಂಡಿದ್ದಾರೆ. ಅಲ್ಲಿ ನಮ್ಮ ಅಭ್ಯರ್ಥಿಗಳನ್ನು ಗೆಲ್ಲಿಸಿ ಅಂತ ಪ್ರಧಾನಿ ಮೋದಿಯೇ ಕರೆ ನೀಡಿದ್ದಾರೆ. ಹೀಗಿದ್ರೂ ಪ್ರಧಾನಿ ಮೋದಿ ಮಂಗಳೂರಿಗೆ ಬರಲಿ ಅಂತ ಎಲ್ಲಾ ಬಿಜೆಪಿ ನಾಯಕರು ಹಾರೈಸುತ್ತಿದ್ದು, ಮೋದಿ ಬಂದ್ರೆ ಗೆಲುವು ಪಕ್ಕಾ ಅನ್ನೋ ಲೆವೆಲ್‌ಗೆ ಬಂದು ನಿಂತಿದ್ದಾರೆ.

ಬಿಲ್ಲವರನ್ನು ಒಲಿಸಿಕೊಳ್ಳಲು ನಾರಾಯಣಗುರು ಜಪ..?

ಬಂಟ – ಬಿಲ್ಲವರ ಫೈಟ್‌ನಲ್ಲಿ ಕಾರ್ಯಕರ್ತರು ಪಕ್ಷವನ್ನು ಮರೆತಿದ್ದಾರೆ ಅನ್ನೋದೇ ಬಿಜೆಪಿ ಪಾಳಯದಲ್ಲಿ ಸದ್ಯಕ್ಕೆ ಇರುವ ಆತಂಕ. ಬಹುತೇಕ ಬಿಲ್ಲವರು ಈ ಬಾರಿ ಪದ್ಮರಾಜ್ ಕೈ ಹಿಡಿತಾರೆ ಅನ್ನೋದು ಪಕ್ಕಾ ಆಗ್ತಾ ಇದ್ದಂತೆ ಬಿಜೆಪಿ ಪಾಳಯದಲ್ಲಿ ನಡುಕ ಆರಂಭವಾಗಿದೆ. ಹೀಗಾಗಿ ಪ್ರಧಾನಿ ಮೋದಿಯವರನ್ನು ಮೊರೆ ಹೋಗಬೇಕಾದ ಇಕ್ಕಟಿನ ಪರಿಸ್ಥಿತಿ ನಿರ್ಮಾಣವಾಗಿದೆ. ಮೋದಿ ಸಮಾವೇಶದಿಂದ ಒಂದಷ್ಟು ಲಾಭದ ಲೆಕ್ಕಾಚಾರ ಮಾಡಿದ್ದ ಬಿಜೆಪಿಗೆ ಸದ್ಯ ಸಮಾವೇಶ ರದ್ದಾಗಿರುವುದು ಬೇಸರ ತಂದಿದೆ. ಆದ್ರೆ ಕನಿಷ್ಟ ರೋಡ್ ಶೋ ಮಾಡಿಯಾದ್ರೂ ಡ್ಯಾಮೇಜ್ ಕಂಟ್ರೋಲ್ ಮಾಡಬೇಕಾಗಿದೆ. ಇನ್ನು ಸಮಾವೇಶದ ಮೈಲೇಜ್‌ ರೋಡ್‌ ಶೋದಲ್ಲಿ ಸಿಗದ ಕಾರಣ ನಾರಾಯಣ ಗುರು ವೃತ್ತದಲ್ಲಿ ಗುರುಗಳಿಗೆ ಮಾಲಾರ್ಪಣೆ ಮಾಡಿ ರೋಡ್ ಶೋದ ಪ್ಲಾನ್ ಮಾಡಲಾಗಿದೆ. ಆದ್ರೆ ಈ ಪ್ಲಾನ್‌ಗೆ ರಾಜ್ಯ ಬಿಜೆಪಿ ಹಾಗೂ ಪ್ರಧಾನಿ ಭದ್ರತಾ ಕಾರ್ಯಾಲಯದಿಂದ ಇನ್ನೂ ಗ್ರೀನ್ ಸಿಗ್ನಲ್ ಸಿಕ್ಕಿಲ್ಲ ಅಂತ ಜಿಲ್ಲಾಧ್ಯಕ್ಷರು ಹೇಳಿದ್ದಾರೆ. ಮೋದಿ ಬಂದು ನಾರಾಯಣ ಗುರುಗಳಿಗೆ ಮಾಲಾರ್ಪಣೆ ಮಾಡಿದ್ರೆ ಪಕ್ಷದಿಂದ ಅಂತರ ಕಾಪಾಡಿಕೊಂಡ ಬಿಲ್ಲವರು ಮತ್ತೆ ಪಕ್ಷದತ್ತ ಮುಖ ಮಾಡಬಹುದು ಅನ್ನೋ ನಿರೀಕ್ಷೆ ಬಿಜೆಪಿಯಲ್ಲಿ ಇದೆ. ಆದ್ರೆ ಇದೆಲ್ಲವೂ ಈಗ ಮತದಾರನ ಬಾಯಿಗೆ ಅಸ್ತ್ರವಾಗಿದ್ದು ಒಬ್ಬೊಬ್ಬರೂ ಒಂದೊಂದು ರೀತಿಯ ಚರ್ಚೆ ನಡೆಸ್ತಾ ಇದ್ದಾರೆ. ಇನ್ನು ಸಾಮಾಜಿಕ ಜಾಲತಾಣದಲ್ಲಿ ಈ ವಿಚಾರದಲ್ಲಿ ಕೈ ಬೆಂಬಲಿಗರು ಬಿಜೆಪಿ ಬೆಂಬಲಿಗರ ಕಾಲೆಳೆಯುತ್ತಿದ್ದಾರೆ. ಒಟ್ಟಾರೆ ಮೋದಿ ಕರೆತರುವ ಬಿಜೆಪಿ ಪ್ಲ್ಯಾನ್ ಸದ್ಯ ಚರ್ಚೆಯ ವಿಷಯ ಆಗಿರೋದಂತು ನಿಜ.