ಪ್ರಧಾನಿ ನರೇಂದ್ರ ಮೋದಿ ದಿನಾ ಅಣಬೆ ತಿನ್ನುತ್ತಾರೆ… ಅದು ಒಂದು ಪೀಸ್ ಗೆ 80 ಸಾವಿರದ್ದು..ಅದು ತೈವಾನಿದ್ದು..ಅದು ಹಿಮಾಲಯದ್ದು.. ಹೀಗೆ ಸಾಕಷ್ಟು ಚರ್ಚೆಗಳು ನಡೆದಿತ್ತು. ಆದ್ರೆ ಪ್ರಧಾನಿ ಮೋದಿ ಅಣಬೆ ತಿನ್ತಾರೋ ಇಲ್ಲವೋ ಗೊತ್ತಿಲ್ಲ. ಆದ್ರೆ ಅಂತಹ ಕಾಸ್ಟ್ಲಿ ಅಣಬೆ ಇರೋದಂತು ಸತ್ಯ. ಅಂತಹ ಅಣಬೆ ಎಲ್ಲಿ ಬೆಳೀತಾರೆ? ರೇಟ್ ಎಷ್ಟಿದೆ ಅಂತ ಗೊತ್ತಾದ್ರೆ ನೀವೂ ಶಾಕ್ ಆಗ್ತೀರಾ. ಅಂತಹ ದುಬಾರಿ ಅಣಬೆಗಳ ಮಾಹಿತಿ ಇಲ್ಲಿದೆ.

ಆರೋಗ್ಯಕರ ತರಕಾರಿ

ಅಣಬೆಗಳನ್ನು ವಿಶ್ವದ ಅತ್ಯಂತ ಆರೋಗ್ಯಕರ ತರಕಾರಿಗಳಲ್ಲಿ ಒಂದೆಂದು ಪರಿಗಣಿಸಲಾಗಿದೆ. ಆದ್ದರಿಂದ, ಇದನ್ನು ಹೆಚ್ಚಾಗಿ ಆಹಾರ ಪಟ್ಟಿಯಲ್ಲಿ ಸೇರಿಸಲಾಗುತ್ತದೆ. ಜಗತ್ತಿನಲ್ಲಿ ಹಲವಾರು ರೀತಿಯ ಅಣಬೆಗಳು ಕಂಡುಬರುತ್ತವೆ, ಆದರೆ ಕೆಲವು ಪ್ರಭೇದಗಳು ಸಾಕಷ್ಟು ದುಬಾರಿಯಾಗಿದೆ. ಜಪಾನ್‌ನ ಮಾಟ್ಸುಟೇಕ್ ಮಶ್ರೂಮ್ ಇಂತಹ ದುಬಾರಿ ಅಣಬೆಗಳಲ್ಲಿ ಒಂದಾಗಿದ್ದು, ಇದನ್ನು ಕೊರಿಯನ್ ಪೆನಿನ್ಸುಲಾ ಮತ್ತು ಚೀನಾದಲ್ಲಿ ಬೆಳೆಯಲಾಗುತ್ತದೆ ಮತ್ತು ಅಮೆರಿಕಾದಲ್ಲಿಯೂ ಅಲ್ಪ ಪ್ರಮಾಣದಲ್ಲಿ ಬೆಳೆಯಲಾಗುತ್ತದೆ.

ಮಾಟ್ಸುಟೇಕ್ ಅಣಬೆಗಳು ಶರತ್ಕಾಲ ಅಂದ್ರೆ ಬೇಸಗೆ ಮತ್ತು ಮಳೆಗಾಲದ ನಡುವೆ ಬೆಳೆಯಲಾಗುತ್ತದೆ. ಇತ್ತೀಚಿನ ದಿನಗಳಲ್ಲಿ ಜಪಾನ್‌ ದೇಶದಲ್ಲಿ ಈ ಅಣಬೆ ಬೆಳೆಯುವುದು ಕಡಿಮೆಯಾಗಿರುವ ಕಾರಣದಿಂದ ಇದು ಅವನತಿಯ ಹಾದಿಯತ್ತ ಸಾಗುತ್ತಿದೆ. ಹೀಗಾಗಿ ಈ ಅಣಬೆಯ ಬೆಲೆ ಸಿಕ್ಕಾಪಟ್ಟೆ ಏರಿಕೆಯಾಗಿದೆ.

ವಿಶೇಷವಾದ ಸುವಾಸನೆಯನ್ನು ಹೊಂದಿರುವ ಕಾರಣ ಈ ಅಣಬೆ ಅಡುಗೆ ಮಾಡುವಾಗ ಸುಮಧುರವಾದ ಪರಿಮಳವನ್ನು ಹರಡುತ್ತದೆ. ಅಷ್ಟೇ ಅಲ್ಲದೆ, ಮಾಂಸದಂತಹ ರುಚಿ ಹಾಗೂ ತಿನ್ನುವಾಗ ಮಾಂಸದಂತ ಅನುಭವ ನೀಡುವ ಕಾರಣ ಇದನ್ನು ಶ್ರೀಮಂತರು ತುಂಬಾ ಇಷ್ಟ ಪಡುತ್ತಾರೆ. ಇವುಗಳ ಬೆಲೆ ಪ್ರತಿ ಪೌಂಡ್‌ಗೆ ಸರಿ ಸುಮಾರು ೫೦೦ ಡಾಲರ್‌ಗಳಾಗಿದ್ದು, ಭಾರತದ ಅಂದಾಜು ೪೧ ಸಾವಿರ ರೂಪಾಯಿಗಳಾಗುತ್ತದೆ. ಅಂದರೆ ಒಂದು ಕೆ.ಜಿ ಅಣಬೆಯ ಬೆಲೆ ಏನಿಲ್ಲಾಂದ್ರೂ ೧ ರಿಂದ ೧.೫ ಲಕ್ಷ ಆಗುತ್ತದೆ.

ಇದನ್ನೂ ಓದಿ : ತೀವ್ರಗೊಳ್ಳುತ್ತಿರುವ ತಾಪಮಾನ; ಹೆಚ್ಚುತ್ತಿದೆ ಫುಡ್ ಪಾಯಿಸನಿಂಗ್ ಪ್ರಕರಣ

ಮಾಟ್ಸುಟೇಕ್ ಅಣಬೆಗಳ ರುಚಿ ಹೇಗಿರುತ್ತೆ?

ಸಾಮಾನ್ಯವಾಗಿ ಜನರು ಅಡುಗೆಯಲ್ಲಿ ಪರಿಮಳ ಸೂಸಲು ಮಸಾಲೆ ಅಥವಾ ದಾಲ್ಚಿನ್ನಿಯಂತಹ ಪದಾರ್ಥಗಳನ್ನು ಹೆಚ್ಚಾಗಿ ಬಳಕೆ ಮಾಡ್ತಾರೆ. ಆದ್ರೆ ಈ ಅಣಬೆಯ ಪದಾರ್ಥಕ್ಕೆ ಇಂತಹ ಮಸಾಲೆಗಳನ್ನು ವಿಶೇಷವಾಗಿ ಬಳಸಬೇಕಾಗಿಲ್ಲ. ಅಣಬೆಯಿಂದ ಹೊರ ಸೂಸುವ ಪರಿಮಳ ಅದು ಎಲ್ಲಾ ಮಸಾಲಾ ಪದಾರ್ಥಗಳಿಗಿಂತಲೂ ವಿಶೇಷವಾಗಿದೆ. ಹೀಗಾಗಿ ಅತ್ಯಂತ ರುಚಿಯಾಗಿಯೂ ತಿನ್ನಲು ಸ್ವಾದಿಷ್ಟವೂ ಆಗಿದೆ.

ಮಾಟ್ಸುಟೇಕ್ ಅಣಬೆಗಳು ಏಕೆ ದುಬಾರಿಯಾಗಿವೆ?

ಹಿಂದೆ ಧಾರಾಳವಾಗಿ ಸಿಗುತ್ತಿದ್ದ ಈ ಅಣಬೆ ಈಗ ಬಹಳ ಕಡಿಮೆ ಪ್ರಮಾಣದಲ್ಲಿ ಪೂರೈಕೆ ಆಗುತ್ತಿದೆ. ಉತ್ತರ ಅಮೆರಿಕಾದಲ್ಲಿ ಹುಟ್ಟಿಕೊಂಡ ಒಂದು ವೈರಾಣು ಹಾಗೂ ನಾಶವಾಗುತ್ತಿರುವ ರೆಡ್‌ ಫೈನ್‌ ಕಾಡುಗಳಿಂದಾಗಿ ಪರಿಸರದ ಮೇಲೆ ತೀವ್ರ ಪರಿಣಾಮ ಬೀರುತ್ತಿದೆ. ಈ ಕಾರಣದಿಂದ ಪರಿಸರದ ನಾಶ ಉಂಟಾಗುತ್ತಿರುವ ಕಾರಣ ವಾತಾವರಣದಲ್ಲೂ ಏರುಪೇರು ಉಂಟಾಗಿದೆ. ಹೀಗಾಗಿ ದಿನೇ ದಿನೇ ಜಪಾನ್‌ ದೇಶದಲ್ಲಿ ಈ ಅಣಬೆ ಬೆಳೆ ಕಡಿಮೆ ಪ್ರಮಾಣದಲ್ಲಿ ಉತ್ಪಾದನೆ ಆಗುತ್ತಿದೆ. ಈಗ ವಾರ್ಷಿಕವಾಗಿ ೧ ಸಾವಿರ ಮೆಟ್ರಿಕ್‌ ಟನ್‌ ಗಿಂತಲೂ ಕಡಿಮೆ ಪ್ರಮಾಣದಲ್ಲಿ ಈ ಅಣಬೆ ಮಾರುಕಟ್ಟೆಗೆ ಬರುತ್ತಿದೆ. ಹೀಗಾಗಿ ಡಿಮ್ಯಾಂಡ್‌ ಜಾಸ್ತಿ ಇದ್ರೂ ಪೂರೈಕೆ ಇಲ್ಲದ ಕಾರಣ ಬೆಲೆ ಈ ಮಟ್ಟಕ್ಕೆ ಏರಿಕೆಯಾಗಿದೆ.