ಮಂಗಳೂರು: ಇಂದು ಮಳಲಿಯಲ್ಲಿ ಹಿಂದೂ ಸಂಘಟನೆಗಳ ನೇತೃತ್ವದಲ್ಲಿ ನಡೆದ ತಾಂಬೂಲ ಪ್ರಶ್ನೆ ಬಗ್ಗೆ ಡಿವೈಎಫ್‌ಐ ರಾಜ್ಯಾಧ್ಯಕ್ಷ ಮುನೀರ್‌ ಕಾಟಿಪಳ್ಳ ಪತ್ರಿಕಾ ಪ್ರಕಟಣೆ ಮೂಲಕ ಹಲವು ಪ್ರಶ್ನೆಗಳನ್ನು ಕೇಳಿದ್ದಾರೆ. ಅದರ ವಿವರ ಇಲ್ಲಿದೆ.

ಮನೇಲ್ (ಮಳಲಿ ಪೇಟೆ) ಇತಿಹಾಸದ ಕುರಿತು ನನ್ನಲ್ಲೂ ಪ್ರಶ್ನೆಗಳಿವೆ. ಮಳಲಿ ರಾಣಿ ಅಬ್ಬಕ್ಕನ ಕಾಲದಿಂದಲೂ ಖ್ಯಾತಿ ಪಡೆದ ಊರು.

ಅದು ಹೆಚ್ಚು ಖ್ಯಾತಿ ಪಡೆದದ್ದು ದೊಡ್ಡ ಪ್ಯೂಡಲ್ ಭೂಮಾಲಕರು ಅಲ್ಲಿ ಇದ್ದ ಕಾರಣಕ್ಕೆ. ಅಲ್ಲಿನ ಹಿಂದುಳಿದ ಜಾತಿಯ ತುಳುವರು, ಬ್ಯಾರಿಗಳು ಗೇಣಿದಾರ ಬಡ ರೈತರಾಗಿದ್ದರು.

ಸ್ವಾತಂತ್ರ್ಯಾ ನಂತರ ಕಮ್ಯುನಿಸ್ಟರ ನೇತೃತ್ವದ ರೈತ ಸಂಘ ಗೇಣಿದಾರರನ್ನು ಸಂಘಟಿಸಿ ತುಳುನಾಡಿನಲ್ಲಿ ಭೂಮಾಲಕ ಧಣಿಗಳ ಶೋಷಣೆಯ ವಿರುದ್ದ ಹೋರಾಟಕ್ಕಿಳಿದಾಗ ಮನೇಲ್ ಎಂದು ಕರೆಯಲ್ಪಡುವ ಮಳಲಿ ಪೇಟೆ ಗುರುಪುರ ಫಿರ್ಕಾದ ರೈತ ಹೋರಾಟದ ಕೇಂದ್ರ ಆಗಿತ್ತು.

ಹಾಗೂ ಹೆಂಚು ಕಾರ್ಖಾನೆಗಳು ಹೇರಳ ಉದ್ಯೋಗ ಸೃಷ್ಟಿಸಿದಾಗ ಅಲ್ಲಿ ದುಡಿಮೆಗೆ ಸೇರಿದ ಈ ಗ್ರಾಮಗಳ ತುಳುವರು, ಬ್ಯಾರಿಗಳು ಕಾರ್ಮಿಕ ಚಳವಳಿಯಲ್ಲಿ ಸೇರಿಕೊಂಡು ಕೆಂಬಾವುಟ ಹಿಡಿದಿದ್ದರು.

ಅರವತ್ತು, ಎಪ್ಪತ್ತರ ದಶಕದಲ್ಲಿ ಸುತ್ತಲ ಗ್ರಾಮಗಳಲ್ಲಿ ಗೇಣಿದಾರರ ಹೋರಾಟ ತೀವ್ರಗೊಂಡಾಗ ಕೆಂಬಾವುಟದ ರೈತ ಹೋರಾಟಕ್ಕೆ ಎದುರಾಗಿ ಭೂ ಒಡೆಯರು ಕಟ್ಟೆಮಾರ್ ಭೂಸೇನೆ ಕಟ್ಟಿದರು.

ಬಂದೂಕುಗಳನ್ನೂ ಪ್ರದರ್ಶಿಸಿ ತಮ್ಮ ಒಕ್ಕಲುಗಳಾದ ಗೇಣಿದಾರರನ್ನು ಭೂ ಹೋರಾಟದಿಂದ ಹಿಮ್ಮೆಟ್ಟಿಸಲು ನೋಡಿದರು‌. ಇಂತಹ ಸಮರ ಶೀಲ ಬದುಕಿನ ಹೋರಾಟದಲ್ಲಿ ಬ್ಯಾರಿಗಳು, ಶ್ರೇಣಿಯಲ್ಲಿ ಕೆಳಗಿದ್ದ ಜಾತಿಯ ತುಳುವರು ಒಟ್ಟಾಗಿದ್ದರು.

ಈ ಐಕ್ಯತೆ, ಕೆಂಬಾವುಟದ ಹೋದಾಟ, ದುಡಿಯುವ ವರ್ಗದ ಪ್ರಜ್ಞೆ ಅವರಿಗೆ ಭೂಮಿಯ ಹಕ್ಕು ಕೊಡಿಸಿತು. ಹಂಚು ಕಾರ್ಖಾನೆಯ ಕಾರ್ಮಿಕರಿಗೆ ನ್ಯಾಯಯುತ ಸಂಬಳ, ಸವಲತ್ತು ಕೊಡಿಸಿತು.
ಈಗ ಕಾಲಚಕ್ರ ತಿರುಗಿದೆ.

ಶರಣ್ ಪಂಪ್ ವೆಲ್ ಗ್ಯಾಂಗ್ ಕೇಸರಿ ಧ್ವಜ ಹಿಡಿದು ಮಳಲಿ ಪ್ರವೇಶಿಸಿದೆ. ಹೊಸ ತಲೆಮಾರಿನ ಒಂದು ವಿಭಾಗಕ್ಕೆ ಬದುಕಿನ ಪ್ರಶ್ನೆಗಳ ಕೆಂಬಾವುಟಕ್ಕಿಂತ, ಮತೀಯ ಉನ್ಮಾದದ ಶರಣ್ ಪಂಪ್ ವೆಲ್ ಕೈಯಲ್ಲಿರುವ ಬಜರಂಗ ದಳದ ಧ್ವಜ ಇಷ್ಟವಾಗುತ್ತಿದೆ.

ರೈತ ಕಾರ್ಯಕರ್ತರ ಮಾರ್ಚ್ ಫಾಸ್ಟ್ ಜಾಗದಲ್ಲಿ ಆರ್‌ಎಸ್‌ಎಸ್‌ನ ಕಬಡ್ಡಿ ಆಕರ್ಷಕವಾಗುತ್ತಿದೆ. ಅದರಿಂದಾಗಿ ಮನೇಲ್ ನ ತುಳುವರು,

ಬ್ಯಾರಿಗಳು ಧರ್ಮದ ಆಧಾರದಲ್ಲಿ ವಿಭಜನೆ ಹೊಂದಿದ್ದಾರೆ. ನೂರಾರು ವರ್ಷಗಳಿಂದ ನೋಡುತ್ತಾ, ಹರಕೆ ಹೇಳುತ್ತಾ ಬಂದ ಅಲ್ಲಿನ ಪುರಾತನ ಪಳ್ಳಿ (ಮಸೀದಿ) ಶರಣ್ ಪಂಪ್ ವೆಲ್ ಹೇಳಿದ ತಕ್ಷಣ ದೇವಸ್ಥಾನವಾಗಿ ಕಾಣಿಸತೊಡಗಿದೆ.

ಮಸೀದಿಯ ಜಾಗದ ಮಾವಿನ ಮರದ ಮಿಡಿ ಮಾವು ಗುತ್ತಿನ‌ ಮನೆಗಳಿಗೆ ಪ್ರತಿವರ್ಷ ತಲುಪುತ್ತಿದ್ದದ್ದು. ಅಲ್ಲಿನ ದರ್ಗಾದ ಉರೂಸಿನ ಸಂದರ್ಭ ಬ್ಯಾರಿಗಳ ಒಟ್ಟಿಗೆ

ಸಂದಲ್ ಮೆರವಣಿಗೆ ನಡೆಸಿದ್ದು, ಮಸೀದಿ ಸುತ್ತ ಆಡಿ ನಲಿದದ್ದು, ಬ್ಯಾರಿ ಕಾಕ ಗಳ ಹೊಟೇಲ್ ನಲ್ಲಿ ಕಡಿಮೆ ದರದಲ್ಲಿ ದೋಸೆ, ಇಡ್ಲಿ ತಿಂದು ಕಾರ್ಖಾನೆಯ ಕೆಲಸಕ್ಕೆ ಹೋದದ್ದು ಮರೆತು ಹೋಗಿದೆ.

ಇದನ್ನೆಲ್ಲ ನೆನಪಿಸಲು ಯಾವ ಪೊದವಾಳರನ್ನು, ಫಣಿಕ್ಕರರನ್ನು ಕೇರಳದಿಂದ ಕರೆಸಿ ಪ್ರಶ್ನೆ ಕೇಳಿಸಬೇಕೊ ಗೊತ್ತಿಲ್ಲ. ಇರಲಿ ಈಗಿನ ಮಸೀದಿ ಹಿಂದೆ ದೇವಸ್ಥಾನ ಆಗಿತ್ತು ಎಂದು ಭಾವನಾತ್ಮಕವಾಗಿ ತಾಂಬೂಲ ಪ್ರಶ್ನೆಯ ಮೂಲಕ ಸಾಧಿಸಲು ಹೊರಟವರಲ್ಲಿ ಕೆಲವೊಂದು ಪ್ರಶ್ನೆಗಳಿವೆ.
ಅಬ್ಬಕ್ಕನ ಕಾಲದಿಂದಲೂ ಮಳಲಿ ಪೇಟೆಯಲ್ಲಿ ನಡೆದ ಬೆಳವಣಿಗೆಗಳಿಗೆ ದಾಖಲೆಗಳಿವೆ. (ಅಲ್ಲಿನ ಮಸೀದಿಗೂ ಕಾನೂನಾತ್ಮಕ ದಾಖಲೆಗಳಿವೆ.) ಆದರೆ ಅದಕ್ಕಿಂತ ಪೂರ್ವದಲ್ಲಿ, ಅಂದರೆ ಮಳಲಿಯಲ್ಲಿ ಜನವಸತಿ ಶುರುವಾದ್ದು ಯಾವ ಶತಮಾನದಲ್ಲಿ.

ಅಲ್ಲಿ ಜನ ವಸತಿ ಆರಂಭಗೊಂಡಾಗ ಇದ್ದ ಸಂಸ್ಕೃತಿ ಯಾವುದು ? ಭೂ ಒಡೆಯರು ಅಲ್ಲಿಗೆ ಕಾಲಿಟ್ಟದ್ದು ಯಾವಾಗ ? ಜೈನರಿಗಿಂತ ಪೂರ್ವದಲ್ಲಿ ಅಲ್ಲಿ ಶೈವರು, ವೈಷ್ಣವರು ವಾಸ ಇದ್ದರೆ ? ತುಳುನಾಡಿನ ಪುರಾತನ ಪಂಗಡಗಳಾದ ಕುಡುಬಿ ಗೌಡರು, ಕುಂಬಾರರು, ಬಿಲ್ಲವರು ಮುಂತಾದವರು ಅಲ್ಲಿ ನೆಲೆಯಾದದ್ದು ಹೇಗೆ ?

ಆಗ ನಡೆದ ಸಂಘರ್ಷಗಳು ಯಾರ ನಡುವೆ, ಹೇಗೆ ನಡೆಯಿತು ? ಈ ಹಿಂದುಳಿದ ಜಾತಿಗಳು ಗೇಣಿದಾರರಾಗಿ ಭೂ ಒಡೆಯರ ಒಕ್ಕಲುಗಳಾದ ಬಗೆ ಹೇಗೆ ? ಇವುಗಳಿಗೆ ಉತ್ತರ ಈಗ ಶರಣ್ ಪಂಪ್ ವೆಲ್ ಸಾರಥ್ಯದಲ್ಲಿ ನಡೆದ ತಾಂಬೂಲ ಪ್ರಶ್ನೆಯಲ್ಲಿ ಸಿಗುತ್ತದೆಯೆ, ಅಥವಾ ಬೇರೆ ಯಾವುದಾದರು ಜನಗಳನ್ನು ಕೇರಳದಿಂದ ಕರೆಸಬೇಕೆ ?

ತಾಂಬೂಲ ಪ್ರಶ್ನೆಯಲ್ಲಿ ಸಿಕ್ಕಿದ ಉತ್ತರದ ಆಧಾರಲ್ಲಿ ಮಳಲಿ ಮಸೀದಿ ಹೋರಾಟಕ್ಕೆ ಇಳಿಯುವ ಮುನ್ನ ಉತ್ತರಿಸಿ. ಮಳಲಿ ಗ್ರಾಮಸ್ಥರು ಕೋಮುವಾದಿ ರಾಜಕಾರಣದ ಆಟಗಳಿಗೆ ಬಲಿ ಬೀಳದೆ ಇದನ್ನೆಲ್ಲ ಗಂಭೀರವಾಗಿ ಆಲೋಚಿಸಬೇಕು. ಮಳಲಿಯ ಬ್ಯಾರಿಗಳು, ಶ್ರಮ ಜೀವಿಗಳಾದ ತುಳುವರು ಕಾಲದಿಂದ ಅಣ್ಣ ತಮ್ಮಂದಿರು ಎಂಬುದನ್ನು ಮರೆಯಬಾರದು.