ಶಿವಮೊಗ್ಗದ ಕಲ್ಲುಕ್ವಾರೆಯಲ್ಲಿ ನಡೆದ ಸ್ಪೋಟ ಪ್ರಕರಣ; ಸರ್ಕಾರದ ವಿರುದ್ಧ ಲಾರಿ ಮಾಲಕರ ಆಕ್ರೋಶ..!

ಉಡುಪಿ: ಶಿವಮೊಗ್ಗದ ಕಲ್ಲುಕ್ವಾರೆಯಲ್ಲಿ ನಡೆದ ಸ್ಪೋಟದ ನಂತರ ಗಣಿಗಾರಿಕೆ ಸಂಬಂಧ ಸರ್ಕಾರ ಕೆಲವೊಂದು ಕಠಿಣಕ್ರಮಗಳನ್ನು ಕೈಗೊಂಡಿದೆ.

ಉಡುಪಿ ಜಿಲ್ಲೆಯಲ್ಲಿ ನೂರಾರು ಸಣ್ಣ ಕಲ್ಲು ಕ್ವಾರೆಗಳು ಕಾರ್ಯಾಚರಿಸುತ್ತಿದ್ದು, ಪೂರ್ವ ಸೂಚನೆ ಇಲ್ಲದೆ ಶಿಲೆ ಕಲ್ಲು, ಜಲ್ಲಿಕಲ್ಲು ಕ್ವಾರೆಗಳ ಪರವಾನಿಗೆಗಳನ್ನು ಏಕಾಏಕಿಯಾಗಿ ಸ್ಥಗಿತ ಮಾಡಲಾಗಿದೆ. ಸರ್ಕಾರದ ಈ ನಿರ್ಧಾರದ ವಿರುದ್ಧ ಲಾರಿ ಮಾಲಕರು ರೊಚ್ಚಿಗೆದ್ದಿದ್ದಾರೆ.

ರಾಜ್ಯದ ಶಿವಮೊಗ್ಗ, ಚಿಕ್ಕಬಳ್ಳಾಪುರದಲ್ಲಿ ಕಲ್ಲು ಕ್ವಾರೆ ಕ್ರಶರ್ ಸ್ಪೋಟಕ್ಕೆ ಸಂಬಂಧಿಸಿ ಇಲಾಖೆ ಕೆಲವೊಂದು ಕಠಿಣ ನಿರ್ಧಾರ ಕೈಗೊಂಡಿದೆ. ಡಿ.ಜಿ.ಎಂ.ಎಸ್‍.ಎಂ ಕಾನೂನನ್ನು ಮುಂದಿಟ್ಟುಕೊಂಡು ಅಭಿವೃದ್ಧಿ ಕಾಮಗಾರಿಗಳಿಗೆ ಅಗತ್ಯವಾಗಿರುವ ಶಿಲೆ ಕಲ್ಲು ಮತ್ತು ಜಲ್ಲಿಕಲ್ಲು ಕ್ವಾರೆಗಳ ಪರವಾನಿಗೆಗಳನ್ನು ಯಾವುದೇ ಮುನ್ಸೂಚನೆ ಕೊಡದೇ ಏಕಾಏಕಿಯಾಗಿ ಸ್ಥಗಿತ ಮಾಡಿದೆ.

ದೊಡ್ಡ ಮಟ್ಟದ ಗಣಿಗಾರಿಕೆಯ ಮಾದರಿಯಲ್ಲಿ ಚಿಕ್ಕಪುಟ್ಟ ಜಲ್ಲಿಕಲ್ಲು ಕ್ರಶರ್, ಕೋರೆಗಳಿಗೂ ಅನ್ವಯಿಸಿ ಕಾನೂನು ರೂಪಿಸಿದ್ದಾಾರೆ. ಕರಾವಳಿಯಲ್ಲಿ ದೊಡ್ಡ ಮಟ್ಟದ ಗಣಿಗಾರಿಕೆ ನಡೆಯುವುದಿಲ್ಲ ಇದರಿಂದ ಲಾರಿ ಮತ್ತು ಟೆಂಪೋ ಮಾಲೀಕರ ಸ್ಥಿತಿ ಶೋಚನೀಯವಾಗಿದೆ.

ಇಲಾಖೆಯು ಯಾವುದೇ ಮುನ್ಸೂಚನೆ ಕೊಡದೇ ಮಾ.11 ರಂದು  ಶಿಲೆ ಕಲ್ಲು, ಜಲ್ಲಿಕಲ್ಲು ಸಾಗಾಟ ಪರವಾನಿಗೆಗಳನ್ನು ಸ್ಥಗಿತ ಮಾಡಿದೆ. ಬೋರ್ ಆಳಕ್ಕೆ ಕೊರೆದು ಸ್ಪೋಟಿಸುವ ಕ್ವಾರೆಗಳಿಗೆ ಅನ್ವಯವಾಗುವ ಕಾನೂನುಗಳನ್ನು ಕರಾವಳಿಗೂ ಬಲವಂತವಾಗಿ ಹೇರಲಾಗಿದೆ.

ಉಡುಪಿ ಜಿಲ್ಲೆಯ ಕ್ವಾರೆಗಳಲ್ಲಿ ಇದುವರೆಗೆ ಯಾವುದೇ ಅನಾಹುತವಾಗಿಲ್ಲ. ಬಳ್ಳಾರಿಗೆ ಅನ್ವಯವಾಗುವ ಕಾನೂನನ್ನು ಕರಾವಳಿಗೆ ಹೇರಬೇಡಿ ಎಂದು ಲಾರಿ ಮಾಲಕರು ಮನವಿ ಮಾಡಿದ್ದಾರೆ.

ಉಡುಪಿ ಜಿಲ್ಲೆಯಲ್ಲಿ 2800 ಕ್ಕೂ ಅಧಿಕ ಕಟ್ಟಡ ಸಾಮಾಗ್ರಿ ಸಾಗಾಟ ಲಾರಿ-ಟೆಂಪೋಗಳಿದ್ದು, ಸಾವಿರಾರು ಮಂದಿಗೆ ಉದ್ಯೋಗಾವಕಾಶ ಕಲ್ಪಿಸಿದೆ.

ಜಿಲ್ಲೆಯಲ್ಲಿ 70 ಕ್ರಶರ್, ಸುಮಾರು 100 ಕೋರೆಗಳಿವೆ. ಎಸಿ ರೂಮ್‍ನಲ್ಲಿ ಕುಳಿತುಕೊಳ್ಳುವ ಅಧಿಕಾರಿಗಳು ಮಾಡಿರುವ ಕಾನೂನುಗಳಿಂದ ಉದ್ಯೋಗ ನಂಬಿಕೊಂಡಿರುವ ಕಾರ್ಮಿಕರು ಅತಂತ್ರರಾಗಿದ್ದಾರೆ ಅನ್ನೋದು ಬಡ ಲಾರಿ ಮತ್ತು ಟೆಂಪೋ ಚಾಲಕ-ಮಾಲಕರ ನೋವು.

ಈ ನಿಟ್ಟಿನಲ್ಲಿ ಕೂಡಲೇ ಕಟ್ಟಡ ಸಾಮಾಗ್ರಿ ಸಾಗಾಟಕ್ಕೆ ಮುಕ್ತ ಅವಕಾಶ ಕೊಡಬೇಕು ಎಂದು ಆಗ್ರಹಿಸಿದ್ದಾರೆ. ದೊಡ್ಡ ಗಣಿಗಾರಿಕೆಯವರು 10-20 ಎಕ್ರೆಯಲ್ಲಿ ಗಣಿಗಾರಿಕೆ ನಡೆಸಿದರೆ, ಕರಾವಳಿಯಲ್ಲಿ ಒಂದೆರಡು ಎಕ್ರೆಯಲ್ಲಿ ಜಲ್ಲಿಕಲ್ಲು ತಯಾರಿಸುತ್ತಾರೆ.

ಇವೆರಡಕ್ಕೂ ಒಂದೇ ಕಾನೂನು ರೂಪಿಸುವುದು ಎಷ್ಟು ಸರಿ? ಹಿಂದೆ ಮರಳಿನ ಸಮಸ್ಯೆಯಿಂದ ಕಟ್ಟಡ ನಿರ್ಮಾಣಗಳು ಸ್ಥಗಿತಗೊಂಡಿದ್ದವು. ಈಗ ಜಲ್ಲಿಕಲ್ಲು, ಶಿಲೆಕಲ್ಲಿನ ಕೊರತೆಯಿಂದ ಕಟ್ಟಡ ಕಾಮಗಾರಿ ನಿಂತಿವೆ. ಸಾಮಾನ್ಯರ ಮನೆಗಳೂ ನಿಂತಿವೆ. ಮರಳು ಕುರಿತಂತೆ ಕರಾವಳಿ ಪ್ರದೇಶಕ್ಕೆ ಪ್ರತ್ಯೇಕ ನೀತಿ ಹೊರಡಿಸುವಂತೆ ಜಲ್ಲಿಕಲ್ಲು, ಶಿಲೆಕಲ್ಲಿಗೂ ಪ್ರತ್ಯೇಕ ನೀತಿ ಅಳವಡಿಸಬೇಕು ಎಂದು ಒತ್ತಾಯಿಸಿದ್ದಾರೆ. ಇಲ್ಲವಾದರೆ ಉಗ್ರ ಪ್ರತಿಭಟನೆ ನಡೆಸುತ್ತೇವೆ ಎಂದು ಲಾರಿ ಮಾಲಕರು ಎಚ್ಚರಿಸಿದ್ದಾರೆ.