ಮಂಗಳೂರಿನಲ್ಲಿ ಅಂತಾರಾಷ್ಟ್ರೀಯ ಮಟ್ಟದ ರಾಂಬೋ ಸರ್ಕಸ್ ಗೆ ಮಂಗಳೂರು ದಕ್ಷಿಣ ಕ್ಷೇತ್ರದ ಶಾಸಕ ವೇದವ್ಯಾಸ ಕಾಮತ್ ಚಾಲನೆ ನೀಡಿದರು.

ಮಂಗಳೂರು: ಮಂಗಳೂರಿನಲ್ಲಿ ಅಂತಾರಾಷ್ಟ್ರೀಯ ಮಟ್ಟದ ರಾಂಬೋ ಸರ್ಕಸ್ ಗೆ ಮಂಗಳೂರು ದಕ್ಷಿಣ ಕ್ಷೇತ್ರದ ಶಾಸಕ ವೇದವ್ಯಾಸ ಕಾಮತ್  ಸೆ.21ರ ಗುರುವಾರದಂದು  ಚಾಲನೆ ನೀಡಿದರು.

ಮಂಗಳೂರಿನ ಡಾ ಟಿ ಎಂ ಎ ಪೈ ಸೆಂಟರ್‌ನ ಹವಾನಿಯಂತ್ರಿತ ಆಡಿಟೋರಿಯಂನಲ್ಲಿ ಮೊದಲ ಬಾರಿಗೆ ಸರ್ಕಸ್ ಪ್ರದರ್ಶನಗೊಳ್ಳುತ್ತಿದ್ದು, ಸೆ. 24ರವರೆಗೆ ರಾಂಬೋ ಸರ್ಕಸ್‌ನ ಬೆರಗುಗೊಳಿಸುವ ಪ್ರದರ್ಶನ ನಡೆಯಲಿದೆ.

ಸರ್ಕಸ್‌ನ  ಮೊದಲ ಪ್ರದರ್ಶನ ಮಂಗಳೂರಿನ ಜನತೆಯ ಮನಸೂರೆಗೊಂಡಿದೆ.

ಬಳಿಕ ಮಾತನಾಡಿದ ಶಾಸಕ ವೇದವ್ಯಾಸ ಕಾಮತ್ ಅವರು ರಾಂಬೋ ಸರ್ಕಸ್ ಹೊಸ ಮಾದರಿಯಲ್ಲಿ ಮಂಗಳೂರಿನ ಜನತೆಯ ಹೃದಯಕ್ಕೆ ಲಗ್ಗೆ ಇಟ್ಟಿದೆ ಎಂದರು.

ಸರ್ಕಸ್ ತಂಡದ ಎಲ್ಲರಿಗೂ ಅವರು ಶುಭ ಹಾರೈಸಿದರು.

ಸರ್ಕಸ್‌ಗೆ ಮಂಗಳೂರಿನ ಜನತೆಯ ಬೆಂಬಲ ಖಂಡಿತಾ ನೀಡುತ್ತಾರೆ. ಕುಟುಂಬ ಸಮೇತ ಈ ಸರ್ಕಸ್ ವೀಕ್ಷಣೆ ಮಾಡಿರಿ ಎಂದರು.

ಜನತೆಯ ತಮ್ಮ ದಿನದ ಜಂಜಾಟಗಳನ್ನು ಮರೆತು ಈ ಸರ್ಕಸ್‌ ವೀಕ್ಷಣೆ ಮಾಡುವ ಮೂಲಕ ಅವರಿಗೆ ನಾವು ಸಹಕಾರ ನೀಡಬೇಕು ಎಂದರು.

ಮಂಗಳೂರು ಮೇಯರ್ ಸುಧೀರ್ ಶಟ್ಟಿ ಕಣ್ಣೂರು ಮಾತನಾಡಿ, 32 ವರ್ಷದ ಹಿಂದೆ ಆರಂಭಗೊಂಡ ರಾಂಬೋ ಸರ್ಕಸ್ ಇಂಡೋರ್ ಸರ್ಕಸ್ ಆಗಿ ಮೂಡಿ ಬಂದರೂ ಈ ಸಂಸ್ಥೆ ನಿತ್ಯನಿರಂತರವಾಗಿ ಪ್ರದರ್ಶನ ನೀಡುವ ಮೂಲಕ ಜನರ ಮನಗೆದ್ದಿದೆ.

60 ಸಿಬ್ಬಂದಿಗಳಿರುವ ಕಲಾವಿದರು ಈ ಪ್ರದರ್ಶನ ನೀಡುವುದು ಮಂಗಳೂರಿಗೆ ನಿಜವಾಗಲೂ ವೀಕ್ಷಣೆಗೆ ಸುವರ್ಣವಕಾಶ ಎಂದರು.

ರಾಂಬೋ ಸರ್ಕಸ್‌ನಲ್ಲಿ ಸೆ. 22ರಂದು 1, 4 ಮತ್ತು 7 ಗಂಟೆಗೆ ಮೂರು ಶೋ, ಸೆ. 23 ಮತ್ತು ಕೊನೆಯ ದಿನ 24ರಂದು ಬೆಳಿಗ್ಗೆ 11 ಗಂಟೆಗೆ, ಮಧ್ಯಾಹ್ನ 1, 4 ಮತ್ತು ಸಂಜೆ 7 ಗಂಟೆಗೆ ಹೀಗೆ 4 ಪ್ರದರ್ಶನಗಳು ಇರಲಿವೆ.

ಮೊದಲ ದಿನದ ಪ್ರದರ್ಶನ ಕಿಕ್ಕಿರಿದು ತುಂಬಿದ ಪ್ರೇಕ್ಷಕರಿಂದ ಪ್ರದರ್ಶಿಸಲ್ಪಟ್ಟಿದೆ.

ನಕ್ಕುನಗಿಸುವ ಜೋಕರ್‌ಗಳ ನಡುವೆ ಹಾಡು, ಮಿಮಿಕ್ರಿ, ಕಾಮಿಡಿ, ಪ್ರತಿಭಾನ್ವಿತ ಕಲಾವಿದರು ನೀಡುವ ರೋಮಾಂಚಕಾರಿ ಪ್ರದರ್ಶನ ವೀಕ್ಷಕರನ್ನು ತುದಿಗಾಲಲ್ಲಿ ನಿಲ್ಲಿಸುವಂತೆ ಮಾಡುತ್ತಿದೆ.

ಪ್ರತಿಯೊಂದು ಒಂದಕ್ಕಿಂತ ಒಂದು ವಿಭಿನ್ನ ಪ್ರದರ್ಶನವಾಗಿದ್ದು, ಕುಡ್ಲ ನಗರಿಯಲ್ಲಿ ಮಾಯಾ ಲೋಕವನ್ನೇ ತೆರೆದಿಟ್ಟಿದೆ.

ಕಾರ್ಯಕ್ರಮದಲ್ಲಿ ಕಾರ್ಪೋರೇಟರ್ ಶಶಿಕಲಾ ಕಾವ, ದಕ್ಷಿಣ ಕನ್ನಡ ಜಿಲ್ಲಾ ಕಾರ್ಯನಿರತಪತ್ರಕರ್ತರ ಸಂಘದ ಅಧ್ಯಕ್ಷ ಶ್ರೀನಿವಾಸ ನಾಯಕ್ ಇಂದಾಜೆ, ಉದ್ಯಮಿ ಗಂಗಾಧರ್‌ , ರಾಂಬೋ ಸರ್ಕಸ್‌ ನ ಮಾಲಕರು, ಪಾಲುದಾರರು ಉಪಸ್ಥಿತರಿದ್ದರು.