ಬಂಟ್ವಾಳ: ಮಹಿಳೆಯೊಬ್ಬರಿಗೆ ಕುಟುಂಬಸ್ಥರೇ ಸೇರಿ ಹಲ್ಲೆ ನಡೆಸಿದ ಘಟನೆ ಬಂಟ್ವಾಳದ ಕಳ್ಳಿಗೆ ಗ್ರಾಮದಲ್ಲಿ ನಡೆದಿದೆ. ಈ ಬಗ್ಗೆ ಬಂಟ್ವಾಳ ನಗರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಘಟನೆ ವಿವರ
ರಂಜನಿ ಎಂಬುವವರು ಲಾರೆನ್ಸ್ ಡಿಸೋಜಾರವರೊಂದಿಗೆ ಜತೆಯಾಗಿ ಕಳೆದ 4 ವರ್ಷಗಳಿಂದ ಹೋಟೇಲ್ ನಡೆಸಿಕೊಂಡು ಬಂದಿದ್ದರು.

ರಂಜನಿ ಅವರು ಲಾರೆನ್ಸ್‌ ಅವರಿಗೆ 8 ಲಕ್ಷದ 50 ಸಾವಿರ ಹಣ ನೀಡಲು ಬಾಕಿ ಇತ್ತು.

ಈ ಹಿನ್ನೆಲೆಯಲ್ಲಿ ನ.2ರಂದು ಸಂಜೆ 6.45ರ ವೇಳೆಗೆ ಲಾರೆನ್ಸ್ ಡಿಸೋಜಾ ಹಣ ಕೇಳಲು ರಜನಿ ಮನೆ ಬಳಿ ಬಂದಿದ್ದರು.

ರಂಜಿನಿ ಹಾಗೂ ಲಾರೆನ್ಸ್‌ ಹಣದ ವಿಷಯ ಮಾತನಾಡುತ್ತಿದ್ದ ವೇಳೆ ರಂಜಿನಿ ಅವರ ಅಕ್ಕನ ಮಕ್ಕಳಾದ ಜ್ಯೋತಿ ಪಲ್ಲವಿ,

ಸುಜಲ್ ಮತ್ತು ತಂಗಿಯ ಮಗನಾದ ಮನನ್ ಮನೆಯ ಒಳಗೆ ಬಂದು ಲಾರೆನ್ಸ್ ಡಿಸೋಜಾರವರನ್ನು ಉದ್ದೇಶಿಸಿ “ಯಿ ದಾಯೆಂಬೆ ಬತ್ತಿನಿ ಇಡೆಗ್” ಎಂದು ತುಳುವಿನಲ್ಲಿ ಕೇಳುತ್ತಾ ಲಾರೆನ್ಸ್ ಅವರ ಶರ್ಟ್ ಕಾಲರ್ ಹಿಡಿದಿದ್ದಾರೆ.

ಈ ವೇಳೆ ರಂಜನಿ ತಡೆಯಲು ಹೋದಾಗ ದೂಡಿ ಹಾಕಿ ಲಾರೆನ್ಸ್ ರವರಿಗೆ ಹೊಡೆದಿದ್ದಾರೆ. ಆಗ ಲಾರೆನ್ಸ್ ಮನೆಯಿಂದ ಹೊರಗೆ ಹೋಗಿದ್ದಾರೆ.
ಈ ವೇಳೆ ರಂಜಿನಿ ನಾನು ಲಾರೆನ್ಸ್‌ನವರನ್ನು ಹಣದ ವಿಷಯ ಮಾತನಾಡುವುದಕ್ಕೆ ನನ್ನ ಮನೆಗೆ ಕರೆದಿದ್ದೇನೆ, ಅದನ್ನು ಕೇಳುವುದಕ್ಕೆ ನೀನು ಯಾರು ಎಂದು ಪ್ರಶ್ನಿಸಿದ್ದಾರೆ.

ತಕ್ಷಣ ಇದೇ ಜ್ಯೋತಿ ಪಲ್ಲವಿ, ಸುಜಲ್ ಮತ್ತು ಮನನ್ ರಂಜನಿಗೆ ಹೊಡೆದಿದ್ದಾರೆ.

ನಂತರ ಜ್ಯೋತಿ ಪಲ್ಲವಿ ಅವರು ರಂಜಿನಿ ಅವರ ಮಗಳು ಅನಿಶಾ ಮತ್ತು ಅಕ್ಕನಾದ ಸರಸ್ವತಿಗೆ ಕರೆ ಮಾಡಿ ಸ್ಥಳಕ್ಕೆ ಬರಹೇಳಿದ್ದಾರೆ. ಈ ವೇಳೆ ಮಗಳು ಅನಿಶಾ, ಸರಸ್ವತಿ, ಪುಷ್ಪಾ ಸ್ಥಳಕ್ಕೆ ಬಂದಿದ್ದಾರೆ. ಈ ವೇಳೆ ತಾಯಿ ರಂಜನಿಯನ್ನು ಮಗಳು ಅನಿಶಾ ಅವ್ಯಾಚ್ಯ ಶಬ್ದಗಳಿಂದ ಬೈದು ಮನೆಯಿಂದ ಹೊರಗೆ ಹಾಕಿರುತ್ತಾಳೆ.
ನಂತರ ಆಕೆಯನ್ನು ಹಿಡಿದು ಮರದ ಸೋಂಟೆಯಿಂದ ಥಳಿಸಿದ್ದಾರೆ. ಜೊತೆಗೆ ಮನನ್ ಚೂರಿಯಿಂದ ಇರಿಯಲು ಮುಂದಾದಾಗ ರಂಜಿನಿ ತಪ್ಪಿಸಿಕೊಂಡು ಮನೆಯ ಒಳಗೆ ಓಡಿಹೋಗಿದ್ದಾರೆ.

ಅಲ್ಲಿಗೆ ಮತ್ತೆ ಓಡಿದ ಮನನ್‌ ಮತ್ತೆ ಹೊಡೆದಿದ್ದಾರೆ. ಈ ವೇಳೆ ಹೊರಗಡೆ ಇದ್ದ ಗಂಡ ‘ಹೊಡೆಯಿರಿ ಅವಳಿಗೆ ಸಾಯಿಸಿ ಅವಳನ್ನು’ ಎಂದು ಹುರುದುಂಬಿಸುತ್ತಿದ್ದರು.

ಬಳಿಕ ನೆರೆ ಮನೆಯವರು ಗಲಾಟೆ ನಿಲ್ಲಿಸಿ ರಂಜನಿಯನ್ನು ಬಂಟ್ವಾಳ ಸರಕಾರಿ ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಈ ಬಗ್ಗೆ ಬಂಟ್ವಾಳ ನಗರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.