ಸುಕ್ಷಿತರ ನಾಡಿನಲ್ಲಿ ಇದೆಂಥ ಕಥೆ..!? ಮಧ್ಯರಾತ್ರಿ 3 ಗಂಟೆಗೂ ಶೌಚಕ್ಕಾಗಿ ಅಲೆದಾಟ..!

ಉಡುಪಿ: ದೇಶ ಸ್ವತಂತ್ರವಾದಾಗ ರಾಷ್ಟ್ರಪಿತ ಮಹಾತ್ಮ ಗಾಂಧಿ ಸ್ವಚ್ಚ ಭಾರತ ಸ್ವಸ್ಥ ಭಾರತದ ಕನಸನ್ನು ಕಂಡಿದ್ದರು.

ಪ್ರಧಾನಿ ನರೇಂದ್ರ ಮೋದಿ ಪ್ರಧಾನಿಯಾದ ಮೊದಲ ಹೆಜ್ಜೆಯಾಗಿ ಸ್ವಚ್ಚತೆಯ ಪಾಠ ದೇಶದ ಜನರಿಗೆ ಹೇಳಿಕೊಟ್ಟರು.

ಸ್ವಚ್ಚ ಭಾರತ ನಿರ್ಮಾಣವಾಗಬೇಕಾದರೆ ದೇಶದಲ್ಲಿ ಬಯಲು ಮುಕ್ತ ಶೌಚಾಲಯ ನಿರ್ಮಾಣವಾಗಬೇಕು ಎಂದು ಮನಗಂಡು, ರಾಷ್ಟ್ರವ್ಯಾಪಿ ದೊಡ್ಡ ಆಂದೋಲನವನ್ನೇ ಹುಟ್ಟು ಹಾಕಿದರು.

ಇದನ್ನು ನನಸು ಮಾಡಲು ಹತ್ತು ಹಲವು ಯೋಜನೆಗಳನ್ನು ತಂದರು. ಆದರೆ ನಿರೀಕ್ಷಿತ ಮಟ್ಟದಲ್ಲಿ ಇದು ಯಶ ಕಾಣಲಿಲ್ಲ ಎಂಬುವುದು ಅಷ್ಟೇ ಸತ್ಯ.

ಇಂದಿಗೂ ಗ್ರಾಮೀಣ ಭಾಗಗಳಲ್ಲಿ ಅದೇ ಪರಿಸ್ಥಿತಿ ನಿರ್ಮಾಣವಾಗಿದೆ. ದೈನಂದಿನ ದೇಹ ಬಾಧೆ ತೀರಿಸಲು ಮೂಲಭೂತವಾಗಿ ಬೇಕಾಗಿದ್ದ ಶೌಚಾಲಯಗಳು ಇಲ್ಲದೆ ಹಲವಾರು ಕುಟುಂಬಗಳು ಇಂದಿಗೂ ಸಂಕಷ್ಟದಲ್ಲಿದೆ.

ಇಂತಹದ್ದೇ ಒಂದು ಕುಟುಂಬ ಕರಾವಳಿ ಜಿಲ್ಲೆ ಉಡುಪಿಯಲ್ಲಿ ಬದುಕುತ್ತಿದೆ. ಇಲ್ಲಿನ ಶಿರ್ವ ಕಳತ್ತೂರು ಗ್ರಾಮದಲ್ಲಿ 22 ವರ್ಷಗಳಿಂದ ಶೌಚಾಲಯವಿಲ್ಲದೆ ಜೀವನವನ್ನು ಸಾಗಿಸುತ್ತಿದೆ ಈ ಕುಟುಂಬ..!.

ಕೃಷ್ಣ ನಗರಿ ಉಡುಪಿಯನ್ನು ಬುದ್ದಿವಂತರ ಜಿಲ್ಲೆ – ಎಜ್ಯುಕೇಷನ್ ಹಬ್ ಎಂದೆಲ್ಲಾ ಕರೆಯುತ್ತಾರೆ.

ಆದರೆ ಇದೆ ಬುದ್ಧಿವಂತರ, ಸುಕ್ಷಿತರ ಜಿಲ್ಲೆಯಲ್ಲಿ ಮೂಲಭೂತವಾಗಿ ಅಗತ್ಯವಾಗಿ ಬೇಕಾಗಿದ್ದ ಶೌಚಾಲಯ ಇಲ್ಲದೇ ಒಂದು ಕುಟುಂಬ ಬದುಕುತ್ತಿದೆ.

ಹೌದು… ಇವರ ಹೆಸರು ಹರೀಶ್ ಆಚಾರ್ಯ ಮತ್ತು ಶಶಿಕಲಾ. ಈ ದಂಪತಿಗೆ ಎರಡು ಮಕ್ಕಳು ಪ್ರಜ್ವಲ್ ಮತ್ತು ಪ್ರಜ್ಞ.

ಆಗಲೋ ಈಗಲೋ ಬೀಳುವ ಹಂತದಲ್ಲಿರುವ ಹರಕು- ಮುರುಕು ಪುಟ್ಟ ಮನೆಯಲ್ಲಿ ಇವರ ವಾಸ.

ಪ್ರಜ್ವಲ್ ಪಿಯುಸಿ ವಿದ್ಯಾಭ್ಯಾಸ ಮಾಡುತ್ತಿದ್ದರೆ, ಪ್ರಜ್ಞ 9ನೇ ತರಗತಿಯಲ್ಲಿ ವಿದ್ಯಾಭ್ಯಾಸ ಮಾಡುತ್ತಿದ್ದಾರೆ. ಪ್ರಜ್ಞ ಓದಿನಲ್ಲಿ ಬಹಳ ಮುಂದು.

ತನ್ನ ಮುರುಕಲು ಮನೆಯ ದೀಪದಲ್ಲಿ ಓದಿ ದಿನಾ ಬೆಳಿಗ್ಗೆ ಶಾಲೆಗೆ ಹೋಗುತ್ತಿದ್ದಾಳೆ.

ಹರೆಯಕ್ಕೆ ಬರುವ ಈ ಹೆಣ್ಮಗಳಿಗೆ ಮನೆಯಲ್ಲಿ ಶೌಚಾಲಯ ಇಲ್ಲದ ಕಾರಣ ರಾತ್ರಿ ಮೂರು ಗಂಟೆಗೆ ಎದ್ದು ಶೌಚ ಮುಗಿಸಿ ಮತ್ತೆ ಮಲಗಿ ಬೆಳಿಗ್ಗೆ ಎದ್ದು ಶಾಲೆಗೆ ಹೋಗಬೇಕಾದ ಅನಿವಾರ್ಯತೆ.

ಒಂದು ಕಡೆ ಹರಕು- ಮುರುಕು ಗುಡಿಸಲಿನಲ್ಲಿ ಬದುಕು ಮತ್ತೊಂದೆಡೆ ಹೆಣ್ಮಕ್ಕಳಿರುವ ಈ ಮನೆಯಲ್ಲೇ ಬಹಿರ್ದೆಸೆಗಾಗಿ ಶೌಚಲಯವಿಲ್ಲದೆ ದಿನ ಕಳೆಯುತ್ತಿದೆ ಈ ಪುಟ್ಟ ಸಂಸಾರ..

ಅನಾರೋಗ್ಯದ ಹಿನ್ನಲೆ ಗಂಡ ಹರೀಶ್ ಆಚಾರ್ಯರಿಗೆ ದುಡಿಯಲು ಆಗುತ್ತಿಲ್ಲ. ಆದ್ದರಿಂದ ಸಂಸಾರ ನಡೆಸುವ ಮತ್ತು ಮಕ್ಕಳ ವಿದ್ಯಾಭ್ಯಾಸ ಇದೆಲ್ಲದರ ಜವಾಬ್ದಾರಿ ಶಶಿಕಲಾ ಮೇಲೆ ಬಿದ್ದಿದೆ.

ಇದಕ್ಕಾಗಿ ಶಶಿಕಲಾ ಬೀಡಿ ಕಟ್ಟಿ ಜೀವನದ ರಥವನ್ನು ಎಳೆದುಕೊಂಡು ಹೋಗುವ ಪ್ರಯತ್ನ ಮಾಡುತ್ತಿದ್ದಾರೆ.

ಕಲಿಕೆಯಲ್ಲಿ ಸದಾ ಮುಂದಿರುವ ಮಗಳು ಪ್ರಜ್ಞಾ ಕಿತ್ತು ತಿನ್ನುವ ಬಡತನದ ನಡುವೆಯೂ ಜೀವನದಲ್ಲಿ ಏನಾದರೂ ಸಾಧಿಸಬೇಕೆಂಬ ಕನಸಿನೊಂದಿಗೆ, ಅದಮ್ಯ ಛಲವನ್ನೂ ಹೊಂದಿದ್ದಾಳೆ.

ಮುಂದಿನ ದಿನಗಳಲ್ಲಿ ಪ್ರಧಾನಿ ನರೇಂದ್ರ ಮೋದಿಯವರಿಗೆ ಪತ್ರವನ್ನು ಬರೆಯಬೇಕೆಂಬ ಆಸೆಯನ್ನಿಟ್ಟುಕೊಂಡಿದ್ದಾರೆ.

ಶೌಚಾಲಯ ಇಲ್ಲದೇ ಅನುಭವಿಸಿದ ನೋವನ್ನು ಅವರೊಂದಿಗೆ ಹಂಚಿಕೊಳ್ಳಬೇಕೆಂಬ ಬಯಕೆ ಈ ಪುಟ್ಟ ಬಾಲಕಿಯದ್ದು..

ಪುಟ್ಟ ಮನೆಯಾದರೂ ಮನೆಗೆ ಡೋರ್ ನಂಬರ್, ರೇಷನ್ ಕಾರ್ಡ್ ಎಲ್ಲವೂ ಇದೆ.

ಹಲವು ಬಾರಿ ಮೂಲ ಸೌಕರ್ಯಗಳ ಸಹಾಯಕ್ಕಾಗಿ ಸ್ಥಳಿಯ ಪಂಚಾಯತ್, ಜನಪ್ರತಿನಿಧಿಗಳ ಮನೆ, ಕಚೇರಿ ಬಾಗಿಲುಗಳನ್ನು ತಟ್ಟಿದರೂ ಯಾವುದೇ ಪ್ರಯೋಜನವಾಗಿಲ್ಲ.

ಸುಮಾರು 15 ವರ್ಷ ಕಾಲ ಮನೆ ತೆರಿಗೆ ಕಟ್ಟಿದರು. ಈವರೆಗೆ ಸ್ಥಳೀಯ ಗ್ರಾಮ ಪಂಚಾಯತ್ ಮಾತ್ರ ಇವರಿಗೆ ಶೌಚಾಲಯ ನಿರ್ಮಾಣ ಮಾಡಿಕೊಟ್ಟಿಲ್ಲ.

ಉಡುಪಿ ಜಿಲ್ಲೆಯಲ್ಲಿ ಬಿಜೆಪಿ ಪ್ರಾಬಲ್ಯ ಹೊಂದಿದ್ದರು, ನರೇಂದ್ರ ಮೋದಿಯ ಕನಸನ್ನು ನನಸು ಮಾಡಲು ಈವರೆಗೆ ಬಿಜೆಪಿಯ ಜನಪ್ರತಿನಿಧಿಗಳಿಗೆ ಆಗಿಲ್ಲವೆಂಬುದೂ ಅಷ್ಟೇ ಬೇಸರದ ಸಂಗತಿಯಾಗಿದೆ.

ಇತ್ತೀಚೆಗೆ ಮಕ್ಕಳ ವಿದ್ಯಾಭ್ಯಾಸಕ್ಕಾಗಿ ಯಾರೋ ದಾನಿಗಳು ಸೋಲಾರ್ ಲೈಟ್ ಅನ್ನು ಅಳವಡಿಸಿಕೊಟ್ಟಿದ್ದಾರೆ.

ಮಕ್ಕಳಿಗೆ ಅಮ್ಮನ ಕಣ್ಣೀರು ಒರೆಸಬೇಕೆಂಬ ಆತುರ ಒಂದು ಕಡೆಯಾದ್ರೆ, ತಾಯಿಗೆ ಮಕ್ಕಳಿಗೆ ವಿದ್ಯಾಭ್ಯಾಸ ನೀಡಿ ಸ್ವಾವಲಂಬಿಯಾಗಿ ಬದುಕಬೇಕು ಆಸೆ ಇನ್ನೊಂದೆಡೆ.

ಎಲ್ಲಾ ತಾಯಂದಿರು ಕಂಡಂತಹ ಕನಸು ಇವರದಾಗಿದೆ. ಮಕ್ಕಳು ಅಮ್ಮನಿಗಾಗಿ ಅಮ್ಮ ಮಕ್ಕಳಿಗಾಗಿ ಬದುಕುತ್ತಿದ್ದಾರೆ ಈ ಪುಟ್ಟ ಗುಡಿಸಲಿನಲ್ಲಿ.

ಮುಂದೆ ಪುಟ್ಟ ಸುಂದರವಾದ ಮನೆ ನಿರ್ಮಾಣ ಮಾಡಿ ಬದುಕು ಸಾಧಿಸಬೇಕೆಂಬುದು ಕನಸು ಇವರದ್ದು. ಆದರೆ ಇದನ್ನು ನನಸು ಮಾಡುವ ದಾನಿಗಳ ನಿರೀಕ್ಷೆಯಲ್ಲಿದೆ ಈ ಪುಟ್ಟ ಕುಟುಂಬ…

ಸಹಾಯ ಮಾಡಲಿಚ್ಛಿಸುವವರು ಈ ಫೋನ್ ನಂಬರ್ ಗೆ ಸಂಪರ್ಕಿಸಬಹುದು:

ಶಶಿಕಲಾ ಆಚಾರ್ಯ

ಉಡುಪಿ ಜಿಲ್ಲೆ ಶಿರ್ವ ಕಳತ್ತೂರು ಗ್ರಾಮ

ಮೊಬೈಲ್: 9844055609.

ಬರಹ: ಪ್ರಮೋದ್ ಸುವರ್ಣ ಕಟಪಾಡಿ, ಉಡುಪಿ