ಮಹಿಳೆಯ ಅಂತ್ಯಸಂಸ್ಕಾರ ಹೈಡ್ರಾಮ: ಶಾಸಕರ ನಡೆಗೆ ಆಕ್ರೋಶ ವ್ಯಕ್ತಪಡಿಸಿದ ಯುಟಿ ಖಾದರ್..

ಮಂಗಳೂರು: ಕೊರೊನಾ ಸೋಂಕಿನಿಂದ ಮೃತಪಟ್ಟ ಬಂಟ್ವಾಳದ ಮಹಿಳೆಯ ಅಂತ್ಯಸಂಸ್ಕಾರ ವಿಚಾರದಲ್ಲಿ ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಹೈಡ್ರಾಮ ನಡೆದಿತ್ತು.

ಇದೀಗ ಈ ಅಮಾನವೀಯ ಘಟನೆಯ ಬಗ್ಗೆ ಶಾಸಕ ಯುಟಿ ಖಾದರ್ ಟ್ವಿಟ್ಟರ್ ಸರಣಿ ಟ್ವೀಟ್ ಮಾಡುವ ಮೂಲಕ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

‘ಮೃತ ಶರೀರದೊಂದಿಗೆ ಅಮಾನವೀಯವಾಗಿ ವರ್ತಿಸುವುದು ಪೈಶಾಚಿಕತೆ. ನಮ್ಮ ಜಿಲ್ಲೆಯಲ್ಲಿ ನಿನ್ನೆ ನಡೆದ ಅಮಾನವೀಯ ಘಟನೆ ನಿಜಕ್ಕೂ ದುಖಕರ.

ನಿನ್ನೆ ಕೋವಿಡ್ ನಿಂದ ಮೃತಪಟ್ಟ ತಾಯಿಯ ಶವ ಸಂಸ್ಕಾರಕ್ಕೆ ರಾತ್ರಿಯಿಡಿ ಪರದಾಡುವಂತಾಗಿರುವುದು ನಾಗರೀಕ ಸಮಾಜ ತಲೆತಗ್ಗಿಸುವಂತಹದ್ದು.

ಅದರಲ್ಲೂ ಶಾಸಕರುಗಳೇ ಮುಂದೆ ನಿಂತು ಶವ ಸಂಸ್ಕಾರಕ್ಕೂ ಅನುಮತಿ ನೀಡದೇ ಇರೋದು ನಿಜಕ್ಕೂ ಖಂಡನೀಯ’.

‘ಇಂತಹ ಪರಿಸ್ಥಿತಿಯಲ್ಲಿ ಜನ ಭಯಬಿದ್ದು ಪ್ರತಿಭಟಿಸುವುದು ಸಾಮಾನ್ಯ. ಆದರೆ ಘಟನೆಯ ವಿವರದ ಜತೆ ಸಮಸ್ಯೆಯ ವೈಜ್ಙಾನಿಕ ಪರಿಹಾರ ನೀಡಿ ಜನರನ್ನ ಜಾಗೃತಗೊಳಿಸುವುದು ಶಾಸಕರ ಕರ್ತವ್ಯ’ ಎಂದಿದ್ದಾರೆ.

‘ಅದರೆ ದಕ್ಷಿಣ ಕನ್ನಡ ಜಿಲ್ಲೆಯ ವಿದ್ಯಾವಂತ ಶಾಸಕರು ಸಾವಿನಲ್ಲೂ ಲೆಕ್ಕಾಚಾರ ಹಾಕಿರುವುದು ಸರಿಯಲ್ಲ. ಧರ್ಮ ಯಾವುದೇ ಇರಲಿ ಸಾವು ಸಂಭವಿಸಿದಾಗ ನಾವು ಗೌರವದಿಂದ ಬಿಳ್ಕೊಡಬೇಕೇ ವಿನಹ ದಾರಿಯಲ್ಲಿ ಶವ ನಿಲ್ಲಿಸಿ ರಾಜಕೀಯ ಮಾಡುವುದು ಸಲ್ಲ’.

‘ಅದು ನಮ್ಮ ಸಂಸ್ಜೃತಿಯೂ ಅಲ್ಲ. ಕಳೆದ ಒಂದು ತಿಂಗಳಿನಿಂದ ದಿನಕ್ಕೆರಡು ಬಾರಿ ಸಭೆ ನಡೆಸುವ ಜಿಲ್ಲಾ ಉಸ್ತುವಾರಿ ಮಂತ್ರಿಗಳು, ಸ್ಥಳಿಯ ಸಂಸದರು,ಶಾಸಕರು ಕೋವಿಡ್ ಪೀಡಿತರ ಶವ ಸಂಸ್ಕಾರದ ವ್ಯವಸ್ಥೆ ಮಾಡಲೂ ವಿಫಲರಾಗಿರುವುದಕ್ಕೆ ಉತ್ತರಿಸುವಿರಾ?.

ಇಂದು DK ದಲ್ಲಿ ನಡೆದ ಘಟನೆ ರಾಜ್ಯದ ಇತರ ಭಾಗದಲ್ಲಿ ನಡೆಯೋ ಮುನ್ನ ಆರೋಗ್ಯ ಹಾಗೂ ಕಂದಾಯ ಸಚಿವರು ಎಚ್ಚೆತ್ತುಕೊಳ್ಳುವುದು ಒಳಿತು’ ಎಂದು ಶಾಸಕ ಯುಟಿ ಖಾದರ್ ಘಟನೆಯ ಬಗ್ಗೆ ಬೇಸರ ವ್ಯಕ್ತಪಡಿಸಿದ್ದಾರೆ.

ಇನ್ನು ಕೊರೋನಾ ಸೋಂಕಿತ ವೃದ್ದೆ ಶವ ಸಂಸ್ಕಾರದ ಹೈಡ್ರಾಮಾ ವಿಚಾರದಲ್ಲಿ ಮಂಗಳೂರಿನಲ್ಲಿ ಮಾಜಿ ಸಚಿವ ಯು.ಟಿ.ಖಾದರ್ ಹೇಳಿಕೆ ನೀಡಿದ್ದು, ಜಿಲ್ಲೆಯಲ್ಲಿ ನಿನ್ನೆ ನಡೆದ ಘಟನೆ ಖೇದಕರ,‌

ನಾಗರಿಕ ಸಮಾಜಕ್ಕೆ ಕಪ್ಪು ಚುಕ್ಕೆ ಎಂದಿದ್ದಾರೆ. ಮೃತ ಶರೀರದ ಜೊತೆ ಕಠೋರವಾಗಿ ವರ್ತಿಸಿ ಅಂತ ಯಾವ ಧರ್ಮವೂ ಹೇಳಿಲ್ಲ.

ಆದರೆ ಶಾಸಕರೇ ಮುಂದೆ ನಿಂತು ಪ್ರತಿಭಟಿಸಿದ್ದು ಆಶ್ಚರ್ಯ ಆಗ್ತಿದೆ. ಶಾಸಕ ಸ್ಥಾನ ಶಾಶ್ವತವಲ್ಲ,

ಮನುಷ್ಯತ್ವೇ ಮುಖ್ಯವಾಗಿದೆ. ಶಾಸಕರ ಮನುಷ್ಯತ್ವ ಇಲ್ಲದ ವರ್ತನೆಯನ್ನ ಖಂಡಿಸ್ತೇನೆ ಎಂದು ಖಾದರ್ ಗುಡುಗಿದ್ದಾರೆ.

ಇನ್ನು ಶವ ಸಂಸ್ಕಾರಕ್ಕೆ ಮಾನವೀಯತೆ ತೋರಿದ ಬಂಟ್ವಾಳ ಶಾಸಕ ರಾಜೇಶ್ ನಾಯ್ಕ್ ನಡೆಯನ್ನು ಸ್ವಾಗತಿಸುತ್ತೇನೆ ಎಂದು ನುಡಿದ ಖಾದರೆ, ದ.ಕ ಜಿಲ್ಲಾಡಳಿತ ಕೊರೋನಾ ಆಕ್ಷನ್ ಪ್ಲಾನ್ ನಲ್ಲಿ ಅಂತ್ಯ ಸಂಸ್ಕಾರದ ಬಗ್ಗೆಯೂ ಯೋಚಿಸಬೇಕು.

ಜಿಲ್ಲಾಡಳಿತ ಈ ವಿಚಾರದಲ್ಲಿ ವಿಫಲವಾಗಿದೆ. ಇದು ರಾಜ್ಯದ ಬೇರೆ ಕಡೆ ಆಗಬಾರದು ಎಂದು ಮನವಿ ಮಾಡಿದ್ದಾರೆ.

ಆರೋಗ್ಯ ಸಚಿವರು, ಕಂದಾಯ ಸಚಿವರು ಈ ಬಗ್ಗೆ ಸೂಕ್ತ ನಿರ್ಧಾರ ಕೈಗೊಳ್ಳಲಿ. ನಿನ್ನೆ ಘಟನೆ ನಡೆದ ಬಗ್ಗೆ ಜಿಲ್ಲಾಡಳಿತ ಮತ್ತು ಇಲ್ಲಿನ ಶಾಸಕರ ಬಗ್ಗೆ ಬೇಸರವಿದೆ.

ಶಾಸಕರು ಮನುಷ್ಯತ್ವ ಅಳವಡಿಸಿಕೊಳ್ಳಬೇಕು, ಇದರಿಂದ ಜನರಿಗೆ ನೋವಾಗಿದೆ ಎಂದು ಮಾಜಿ ಸಚಿವ ಖೇದ ವ್ಯಕ್ತಪಡಿಸಿದ್ದಾರೆ.

ಬಳಿಕ ಪಾದರಾಯನಪುರ ಹಲ್ಲೆ ಪ್ರಕರಣದ ಆರೋಪಿಗಳನ್ನು ರಾಮನಗರಕ್ಕೆ ಶಿಫ್ಟ್ ಮಾಡಿದ ವಿಚಾರದ ಬಗ್ಗೆ ಮಾತನಾಡಿದ ಶಾಸಕರು,

ಇದು ಸರ್ಕಾರವೇ ಸೃಷ್ಟಿಸಿದ ದೊಡ್ಡ ಸಮಸ್ಯೆ. ಏಕಾಏಕಿ ಆರೋಪಿಗಳನ್ನು ಅಲ್ಲಿನ ಜೈಲಿಗೆ ಶಿಫ್ಟ್ ಮಾಡಿದ್ದು ಸರಿಯಲ್ಲ.

ಸರ್ಕಾರ ಯಾವುದನ್ನೂ ಯೋಚನೆ ಮಾಡದೇ ಇಲ್ಲದೆ ಯಾಕೆ ಮಾಡುತ್ತೆ.?. ಕೊರೊನಾ ಎದುರಿಸಲು ಸರ್ಕಾರದಲ್ಲಿ ಪ್ಲಾನ್ ಇಲ್ಲ ಅನ್ನೋದಕ್ಕೆ ಇದೊಂದು ಉದಾಹರಣೆ.

ಇವತ್ತು ಸಮಸ್ಯೆ ಆಗಿದೆ, ಹೀಗಾಗಿ ಸರ್ಕಾರಕ್ಕೆ ಒಂದು ಆಕ್ಷನ್ ಪ್ಲಾನ್ ಇರಬೇಕು. ಜನಸಾಮಾನ್ಯರು ಸಹಕಾರ ಕೊಟ್ಟರೂ ಸರ್ಕಾರ ಇನ್ನೂ ಆಕ್ಷನ್ ಪ್ಲಾನ್ ಇಲ್ಲ ಎಂದು ರಾಜ್ಯ ಸರ್ಕಾರವನ್ನು ಟೀಕೆ ಮಾಡಿದ್ದಾರೆ.