ಮಂಗಳೂರು: ಬೆಳ್ತಂಗಡಿಯಲ್ಲಿ ಬಜರಂಗದಳದ ಕಾರ್ಯಕರ್ತನಿಂದ ಹತ್ಯೆಯಾದ ದಲಿತ ವರ್ಗದ ದಿನೇಶ್‌ ಕನ್ಯಾಡಿ ನ್ಯಾಯಕ್ಕಾಗಿ ಎಸ್‌ಡಿಪಿಐ ಹಾಗೂ ದಲಿತ ಸಂಘಟನೆಗಳಿಂದ ಮಾ.15ರಂದು ಬೆಳ್ತಂಗಡಿಯಿಂದ ಮಂಗಳೂರಿನ ಡಿಸಿ ಕಚೇರಿಗೆ ಬೃಹತ್‌ ಪಾದಾಯಾತ್ರೆ ನಡೆಯಲಿದೆ ಎಂದು ಎಸ್ ಡಿಪಿಐ ದ.ಕ ಜಿಲ್ಲಾಧ್ಯಕ್ಷ ಅಬೂಬಕ್ಕರ್ ಕುಳಾಯಿ ಹೇಳಿದ್ದಾರೆ.

ಈ ಬಗ್ಗೆ ಎಸ್‌ಡಿಪಿ ಕಚೇರಿಯಲ್ಲಿ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿ, ಫೆ. 23 ರಂದು ದಲಿತ ಕುಟುಂಬದ ದಿನೇಶ್‌ ಕನ್ಯಾಡಿ ಎಂಬುವವನಿಗೆ ಸಂಘಪರಿವಾರದ ಬಜರಂಗದಳದ ಕಾರ್ಯಕರ್ತ ಹಲ್ಲೆ ಮಾಡಿ ಕೊಲೆಗೈದಿದ್ದಾನೆ.

ಸಂಘಪರಿವಾರದ ಕಾರ್ಯಕರ್ತ ಕೊಲೆಯಾದರೆ ಬಿಜೆಪಿಯ ಎಲ್ಲಾ ರಾಜಕೀಯ ನಾಯಕರು ಭೇಟಿ ನೀಡಿ ಸರಕಾರದಿಂದ 25 ಲಕ್ಷ ರೂಪಾಯಿ ಕೊಟ್ಟಿದ್ದಾರೆ.

ಆದರೆ ಜನಪ್ರತಿನಿಧಿ, ಸರಕಾರ ಅಧಿಕಾರಿಗಳು ಮನೆಗೆ ಹೋಗಿಲ್ಲ. ಪರಿಹಾರ ನೀಡಿಲ್ಲ.ಇದು ಬಹಳ ಅನ್ಯಾಯ. ಎಸ್‌ಡಿಪಿ ಭೇಟಿ ನೀಡಿ ಸಾಂತ್ವನ ಹೇಳಿದ್ದೇವೆ.

50 ಲಕ್ಷ ರೂಪಾಯಿ ಪರಿಹಾರ ನೀಡಿ, ಆತನ ಕುಟುಂಬಕ್ಕೆ ಸರ್ಕಾರಿ ಕೆಲಸ, ಎರಡು ಎಕ್ರೆ ಭೂಮಿ ಪರಿಹಾರವಾಗಿ ನೀಡಬೇಕು. ಜೊತೆಗೆ ಆರೋಪಿಯನ್ನು ಬಂಧಿಸಿ ಕಠಿಣ ಶಿಕ್ಷೆ ನೀಡುವಂತೆ ಆಗ್ರಹಿಸಿದ್ದಾರೆ.
ಈ ಹಿನ್ನೆಲೆಯಲ್ಲಿ ದಲಿತ ಸಂಘಟನೆಗಳು ಹಾಗೂ ಎಸ್‌ಡಿಪಿಐನಿಂದ ಮಂಗಳೂರು ಜಿಲ್ಲಾಧಿಕಾರಿ ಕಚೇರಿಗೆ ಬೆಳ್ತಂಗಡಿಯಿಂದ ಮಾ. 15ರಂದು ಹೊರಟು ಮಾ.17ಕ್ಕೆ ಮಂಗಳೂರು ತಲುಪಲಿದೆ.

ದಲಿತ ಸಂಘಟನೆಗಳು, ಹಾಗೂ ಎಸ್‌ಡಿಪಿನ ಮುಖಂಡ ಭಾಸ್ಕರ ಪ್ರಸಾದ್‌ ನೇತೃತ್ವದಲ್ಲಿ ಈ ಪಾದಾಯಾತ್ರೆ ನಡೆಯಲಿದೆ ಎಂದರು.

‘ವೈಯುಕ್ತಿಕ ದ್ವೇಷದಿಂದ ಹರ್ಷನ ಕೊಲೆ’
ಶಿವಮೊಗ್ಗದಲ್ಲಿ ಕ್ರಿಮಿನಲ್‌ ಹಿನ್ನೆಲೆಯ ವ್ಯಕ್ತಿಯ ಕೊಲೆಯಾಗುತ್ತದೆ. ಇದು ವೈಯುಕ್ತಿಕ ದ್ವೇಷದಿಂದಾದ ಕೊಲೆ. ಇದನ್ನು ತನಿಖಾಧಿಕಾರಿಗಳು ಸಹ ಸ್ಪಷ್ಟಪಡಿಸಿದ್ದಾರೆ. ಆದರೆ ಇದನ್ನು ಸಂಘಪರಿವಾರ ಹಾಗೂ ಬಿಜೆಪಿಗರು ಕೋಮುಗಲಭೆ ಹುಟ್ಟು ಹಾಕಲು ಪ್ರಯತ್ನ ಪಟ್ಟಿದ್ದಾರೆ.

ಅಲ್ಲಿ ಕೊಲೆಯಾದವನಿಗೆ ಪರಿಹಾರ ನೀಡಿದ್ದಾರೆ. ಅದನ್ನು ನಾವು ಖಂಡಿಸುವುದಿಲ್ಲ. ಬದಲಾಗಿ ತಾರತಮ್ಯದ ನೀತಿಯನ್ನು ಖಂಡಿಸುತ್ತೇವೆ. ಕರ್ನಾಟಕದ ಇತಿಹಾಸದಲ್ಲೇ ಮೊದಲ ಬಾರಿಗೆ ವೈಯುಕ್ತಿಕ ದ್ವೇಷಕ್ಕೆ ಕೊಲೆಯಾದವನಿಗೆ ಮುಖ್ಯಮಂತ್ರಿ ಪರಿಹಾರ ನಿಧಿಯಿಂದ ಕೊಟ್ಟಿದ್ದಾರೆ.

ಅದಕ್ಕೆ ಕೆಲವು ಮಾನದಂಡಗಳು ಇವೆ. ಬಹುತೇಕ ಮಾಧ್ಯಮಗಳು ಸಹ ಮರೆತಿವೆ. 2 ಎಕ್ರೆ ಜಮೀನು ಕೊಡಬೇಕು.

ಪತ್ರಿಕಾಗೋಷ್ಠಿಯಲ್ಲಿ ಎಸ್ ಡಿಪಿಐ ರಾಜ್ಯ ಸಮಿತಿ ಸದಸ್ಯ ಜಲೀಲ್.ಕೆ, ಜಿಲ್ಲಾ ಪ್ರ.ಕಾರ್ಯದರ್ಶಿ ಅನ್ವರ್ ಸಾದಾತ್ ಬಜತ್ತೂರು,ಜಿಲ್ಲಾ ಕಾರ್ಯದರ್ಶಿ ಅಕ್ಬರ್ ಬೆಳ್ತಂಗಡಿ ಉಪಸ್ಥಿತರಿದ್ದರು.