ಗೋ ಹತ್ಯೆ-ಮತಾಂತರ ನಿಷೇಧ ಕಾಯ್ದೆ ಹಿಂಪಡೆಯುವ ಸರ್ಕಾರದ ನಿಲುವನ್ನು ಕರಾವಳಿ ಸಾಧು ಸಂತರು, ಮಠಾಧೀಶರು ತೀವ್ರವಾಗಿ ಖಂಡಿಸಿದ್ದು ಈ ಬಗ್ಗೆ ಸರ್ಕಾರಕ್ಕೆ ಮನವಿ ಸಲ್ಲಿಸಲು ನಿರ್ಧರಿಸಿದ್ದಾರೆ. 

ಮಂಗಳೂರು : ಗೋ ಹತ್ಯೆ-ಮತಾಂತರ ನಿಷೇಧ ಕಾಯ್ದೆ ಹಿಂಪಡೆಯುವ ಸರ್ಕಾರದ ನಿಲುವನ್ನು ಕರಾವಳಿ ಸಾಧು ಸಂತರು, ಮಠಾಧೀಶರು ತೀವ್ರವಾಗಿ ಖಂಡಿಸಿದ್ದು ಈ ಬಗ್ಗೆ ಸರ್ಕಾರಕ್ಕೆ ಮನವಿ ಸಲ್ಲಿಸಲು ನಿರ್ಧರಿಸಿದ್ದಾರೆ. 

ಈ ಬಗ್ಗೆ ಮಂಗಳೂರಿನಲ್ಲಿ ಸಭೆ ಸೇರಿದ ಕರಾವಳಿಯ ಸಾಧು ಸಂತರು ಸರ್ಕಾರದ ನಿಲುವಿಗೆ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ.

ಬಳಿಕ ಸುದ್ದಿಗೋಷ್ಟಿ ನಡೆಸಿದ ವಿವಿಧ ಮಠಾಧೀಶರು ಗೋಹತ್ಯೆ ನಿಷೇಧ ಕಾಯ್ದೆ ಹಿಂದಕ್ಕೆ ಪಡೆದುಕೊಳ್ಳುವುದು, ಮತಾಂತರ ಕಾಯ್ದೆಯನ್ನು ರದ್ದುಪಡಿಸುವುದು, ಲವ್‌ ಜಿಹಾದ್ ಪ್ರಕರಣಗಳನ್ನು ಹತ್ತಿಕ್ಕದಿರುವುದು, ಹಿಂದೂ ಸಂಘಟನೆ ನಾಯಕರ ವಿರುದ್ಧ ಗಡೀಪಾರು ಪ್ರಕ್ರಿಯೆ ನಡೆಸುತ್ತಿರುವುದು ಸೇರಿದಂತೆ ರಾಜ್ಯದ ಕಾಂಗ್ರೆಸ್ ಸರಕಾರ ಕೆಲವೊಂದು ಹಿಂದು ವಿರೋಧಿ ನೀತಿಗಳನ್ನು ಕೈಗೊಂಡಿರುವುದು ಸರಿಯಲ್ಲ. ಇದನ್ನು ಇಡೀ ಸಂತ ಸಮುದಾಯ ಖಂಡಿಸುತ್ತದೆ ಎಂದರು.

ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಮಾಣಿಲ ಕ್ಷೇತ್ರದ ಮೋಹನ ದಾಸ ಸ್ವಾಮೀಜಿ, ಈ ಹಿನ್ನೆಲೆಯಲ್ಲಿ ಸೆಪ್ಟೆಂಬರ್ 10ರ ಬಳಿಕ ನಮ್ಮ ಒಕ್ಕೊರೊಲ ಮನವಿಯನ್ನು ಮುಖ್ಯಮಂತ್ರಿ, ಉಪಮುಖ್ಯಮಂತ್ರಿ,ರಾಜ್ಯಪಾಲರಿಗೆ, ಗೃಹ ಸಚಿವರಿಗೆ ಸಲ್ಲಿಸುತ್ತೇವೆ.

ನಾವೆಲ್ಲರೂ ಸಂತ ಸಮುದಾಯದ ಒಟ್ಟು ಸೇರಿ ಅವರನ್ನು ಮುಖತಃ ಭೇಟಿ ಮಾಡಲಿದ್ದೇವೆ ಎಂದರು.

ಒಡಿಯೂರು ಕ್ಷೇತ್ರದ ಗುರುದೇವಾನಂದ ಸ್ವಾಮೀಜಿ ಮಾತನಾಡಿ, ನಾವೆಲ್ಲರೂ ಒಟ್ಟು ಸೇರಿ ಹಿಂದು ಸಮುದಾಯದ ಮೇಲೆ ಆಗುವ ಕೆಲವು ಸರಕಾರದ ನಿರ್ಣಯಗೊಳಿಂದ ಗೊಂದಲ ಆಗುವುದರಿಂದ ಸಂತರು ಎಲ್ಲಾ ಒಗ್ಗಟ್ಟಾಗಿ ಹೋರಾಟಕ್ಕೆ ಸಿದ್ಧತೆ ಮಾಡಿದ್ದಾರೆ ಎಂದರು.

ಸಮಾಜಕ್ಕೆ ತೊಂದರೆ ಆದಾಗ ಸಂತ ಸಮುದಾಯ ಒಗ್ಗಟ್ಟಾಗಿ ನಿಲ್ಲುತ್ತದೆ ಎಂದರು.

ಗುರುಪುರ ಮಠದ ವಜ್ರದೇಹಿ ಸ್ವಾಮೀಜಿ ಮಾತನಾಡಿ, ಲವ್‌ ಜಿಹಾದ್‌ಗೆ ಸೂಕ್ತ ಕಡಿವಾಣ ಹಾಕಲು ಪೊಲೀಸರು ಮುಂದಾಬೇಕು.

ಆದರೆ ಆಂಟಿ ಕಮ್ಯೂನಲ್ ವಿಂಗ್ ಮೂಲಕ ಹಿಂದು ಯುವಕರನ್ನು ಹತ್ತಿಕ್ಕುವ ಪ್ರಯತ್ನ ನಡೆಸಲಾಗುತ್ತಿದೆ.

ವಿನಾಃ ಕಾರಣ ಹಿಂದೂ ಯುವಕರನ್ನು ಗಡೀಪಾರು ಮಾಡುವ ಬಗ್ಗೆಯೂ ನಮ್ಮ ಗಮನಕ್ಕೆ ಬಂದಿದೆ.

ವಿನಾಕಾರಣ ಹಿಂದು ಯುವಕರಿಗೆ ಕಿರುಕುಳ ನೀಡಿದರೆ ಈ ಬಗ್ಗೆಯೂ ನಾವೂ ತೀವ್ರ ಹೋರಾಟ ಮಾಡಲಿದ್ದೇವೆ ಎಂದರು.

ಸಮಾನ ನಾಗರಿಕ ಸಂಹಿತೆ ವಿಚಾರದಲ್ಲೂ ನಾವು ಜಾಗೃತಿ ಮೂಡಿಸುತ್ತಿದ್ದೇವೆ.

ಹಿಂದು ಸಮಾಜದ ಇಡೀ ನಿರ್ಣಯವನ್ನು ಮಾಡಿಕೊಂಡು ನಾವು ಸಂಘಟಿತರಾಗಿ ಹೋರಾಟ ಮಾಡಲಿದ್ದೇವೆ.

ಎಲ್ಲಾ ಮಠಾಧೀಶರನ್ನೂ ಭೇಟಿ ಮಾಡಿ ಒಕ್ಕೊರಳ ನಿರ್ಣಯ ಮಾಡಿ ಇಡೀ ಕರ್ನಾಟಕ ರಾಜ್ಯದಾದ್ಯಂತ ಪ್ರತಿಭಟನೆ ನಡೆಸಲು ಸಂತ ಸಮುದಾಯ ಒಕ್ಕೊರಳ ನಿರ್ಣಯ ಮಾಡಿದ್ದೇವೆ ಎಂದರು.

ಹಿಂದುಗಳಿಗೆ ಅನ್ಯಾಯವಾಗುವ ಯಾವುದೇ ವಿಚಾರ ಬಂದಾಗಲೂ ಸಂತ ಸಮುದಾಯ ಒಗ್ಗಟ್ಟಿನಿಂದ ಹೋರಾಟವನ್ನು ಮಾಡಿದ್ದೇವೆ.

ನಮಗೆ ಸರಕಾರದಿಂದ ನ್ಯಾಯ ಸಿಗದೇ ಇದ್ದಲ್ಲಿ ನ್ಯಾಯಾಲಯದ ಮೆಟ್ಟಲೇರಲೂ ಸಂತ ಸಮುದಾಯ ಮುಂದಾಗಲಿದೆ ಎನ್ನುವ ನಿರ್ಣಯವನ್ನು ಮಾಡಿದ್ದೇವೆ ಎಂದರು.

ಕಣಿಯೂರು ಕ್ಷೇತ್ರದ ಮಹಾಬಲ ಸ್ವಾಮೀಜಿ, ಕೊಂಡೆವೂರು ನಿತ್ಯಾನಂದ ಪೀಠದ ಶ್ರೀಗಳು, ಈಶ ವಿಠಲದಾಸ ಸ್ವಾಮೀಜಿ, ವಿದ್ಯಾನಂದ ಸರಸ್ವತೀ ಸ್ವಾಮೀಜಿ, ಹಿಂದು ಮುಖಂಡರಾದ ಎಂ ಬಿ ಪುರಾಣಿಕ್‌, ಪ್ರಕಾಶ್ ಪಿ ಎಸ್ ಮೊದಲಾದವರು ಸುದ್ದಿಗೋಷ್ಟಿಯಲ್ಲಿ ಉಪಸ್ಥಿತರಿದ್ದರು.