ಮಂಗಳೂರು: ‘ಜಿಹಾದಿ ಶಕ್ತಿಗಳು ನನ್ನ ಮೇಲೆ ದಾಳಿ ಮಾಡಲು ಯತ್ನಿಸಿದೆ. ನಾನು ಪ್ರಯಾಣಿಸುತ್ತಿದ್ದ ಖಾಸಗಿ ಕಾರಿನ ಮೇಲೆ ದಾಳಿ ನಡೆದಿದೆ. ಅದು ಕೇರಳ ನೊಂದಣಿಯ ಕಾರಾಗಿದ್ದು ನಂಬರ್ ಸಹ ಇದೆ. ಗೃಹ ಸಚಿವರೂ ಮಾತನಾಡಿ ಭದ್ರತೆ ಒದಗಿಸುವುದಾಗಿ ಹೇಳಿದ್ದಾರೆ’ ಎಂದು ಬೆಳ್ತಂಗಡಿ ಶಾಸಕ ಹರೀಶ್ ಪೂಂಜಾ ಹೇಳಿದ್ದಾರೆ.

ಕಾರ್ ಮೇಲೆ ನಡೆದ ದಾಳಿ ಯತ್ನ ವಿಚಾರವಾಗಿ ಮಂಗಳೂರಿನಲ್ಲಿ ಖುದ್ದು ಮಾತನಾಡಿದ ಬೆಳ್ತಂಗಡಿ ಶಾಸಕ ಹರೀಶ್ ಪೂಂಜಾ ‘ನಿನ್ನೆ ವಿಮಾನ ನಿಲ್ದಾಣದಿಂದ ಬೆಳ್ತಂಗಡಿಗೆ ಹೋಗುವಾಗ ದಾಳಿ ಮಾಡಿದ್ದಾರೆ.

ದಾರಿ ಮದ್ಯೆ ಡೀಸೆಲ್ ಹಾಕಲು ಪೆಟ್ರೋಲ್ ಬಂಕ್ ನಲ್ಲಿ ನಿಲ್ಲಿಸಿದ್ದೆವು. ನಾನು ಖಾಸಗಿ ಕಾರಿನಲ್ಲಿದ್ರೆ ನನ್ನ ಸರ್ಕಾರಿ ಕಾರನ್ನು ಡ್ರೈವರ್ ಚಲಾಯಿಸ್ತಾ ಇದ್ದ.

ಅಡ್ಯಾರಿನಿಂದ ಪರಂಗಿಪೇಟೆಯ ತನಕ ಆತ ನಮ್ಮನ್ನು ಚೇಸ್ ಮಾಡಿದ್ದ. ನನ್ನ ಸರ್ಕಾರಿ ಕಾರು ನಮ್ಮ ಹಿಂದೆ ಇದ್ದು ಅದಕ್ಕೆ ಮೊದಲು ದಾಳಿಯಾಗಿದೆ.

ಬಳಿಕ ತಕ್ಷಣ ಘಟನೆಯ ಬಗ್ಗೆ ದೂರವಾಣಿಯಲ್ಲಿ ಬಂಟ್ವಾಳ ಡಿವೈಎಸ್ಪಿಗೆ ತಿಳಿಸಿದ್ದೆ. ತಕ್ಷಣ ಕಾರ್ಯ ಪ್ರವೃತ್ತರಾದ ಪೊಲೀಸರು ಪರಂಗಿಪೇಟೆಯಲ್ಲಿ ಬ್ಯಾರಿಕೇಡ್ ಹಾಕಿದ್ರು. ಆದ್ರೆ ನಮ್ಮ ಕಾರ್ ಸೈಡ್ ಹಾಕುತ್ತಿದ್ದಂತೆ ಬೇರೆ ಕಾರುಗಳ ಜೊತೆ ಬ್ಯಾರಿಕೇಡ್ ಪಾಸಾಗಿದ್ದಾನೆ.

ಆತ ವೇಗವಾಗಿ ಹೋದ ಕಾರಣ ಪೊಲೀಸರಿಗೆ ಬ್ಯಾರಿಕೇಡ್ ಹಾಕಲು ಆಗಿಲ್ಲ. ಆದರೆ ಪೊಲೀಸರಿಗೆ ವಾಹನದ ಬಗ್ಗೆ ಸಂಪೂರ್ಣ ಮಾಹಿತಿ ನೀಡಿದ್ದೇವೆ.

ನಿನ್ನೆ ಬಂಟ್ವಾಳ ಗ್ರಾಮಾಂತರ ಠಾಣೆಯಲ್ಲಿ FIR ಆಗಿದೆ. ನನಗೆ ಈ ಹಿಂದೆ ಯಾವುದೇ ರೀತಿಯ ಬೆದರಿಕೆ ಇರಲಿಲ್ಲ. ನಾನೊಬ್ಬ ಹಿಂದೂ ಕಾರ್ಯಕರ್ತನಾಗಿ ಈಗ ಶಾಸಕನಾಗಿದ್ದೇನೆ.

ಜಿಹಾದಿ ಮಾನಸಿಕತೆಯ ಜನರನ್ನ ಯಾವತ್ತೂ ವಿರೋಧಿಸುತ್ತೇನೆ. ಈ ಘಟನೆಯಿಂದ ನನಗೆ ಇನ್ನಷ್ಟು ಕೆಲಸ‌ ಮಾಡಲು ಶಕ್ತಿ ಕೊಟ್ಟಿದೆ.

ಸರ್ಕಾರ ಭದ್ರತೆ ನೀಡಿದ್ರೆ ಹಿರಿಯರ ಸಲಹೆ ಪಡೆದು‌ ಪಡೆದುಕೊಳ್ಳುತ್ತೇನೆ’ ಎಂದು ಹೇಳಿದರು.

ಈ ಬಗ್ಗೆ ಪ್ರತಿಕ್ರಿಯಿಸಿರುವ ಮಂಗಳೂರು ವಿಭಾಗ ಬಜರಂಗದಳ ಸಂಯೋಜಕರಾದ ಭುಜಂಗ ಕುಲಾಲ್ ‘ನಿನ್ನೆ ರಾತ್ರಿ 11:30ಕ್ಕೆ ಶಾಸಕರಾದ ಹರೀಶ್ ಪೂಂಜ ರವರನ್ನು ಪರಂಗಿಪೇಟೆಯಲ್ಲಿ ಮಾರಕಾಸ್ತ್ರಗಳನ್ನು ತೋರಿಸಿ ಅವ್ಯಾಚವಾಗಿ ಬೈದು ಕೊಲೆಗ ಮಾಡಲು ಯತ್ನಿಸಿದ ಕೃತ್ಯವು ಇಡೀ ಜಿಲ್ಲೆಯ ಜನತೆಯನ್ನು ಭಯಭೀತಿಗೊಳಿಸಿದೆ.

ಶಾಸಕರನ್ನ ಅಡ್ಡಗಟ್ಟಿ ಮಾರಕಾಸ್ತ್ರ ಝಲಪಿಸಿ ಕೊಲೆಗೆ ಯತ್ನಿಸಿದ ಕೃತ್ಯವು ಇದೊಂದು ಭಯೋತ್ಪಾದಕ ಕೃತ್ಯವಾಗಿದ್ದು, ತಕ್ಷಣ ಈ ಕೃತ್ಯ ಮಾಡಿದವರನ್ನು ಬಂಧಿಸಿ ಕುಲಂಕುಶವಾಗಿ ತನಿಖೆ ಮಾಡಿ ಇದರ ಹಿಂದೆ ಇರುವ ಜಾಲವನ್ನು ಪತ್ತೆ ಹಚ್ಚಿ ಕಠಿಣ ಕ್ರಮ ಕೈಗೊಳ್ಳಬೇಕೆಂದು ಪತ್ರಿಕಾ ಪ್ರಕಟಣೆಯಲ್ಲಿ ಸರಕಾರವನ್ನು ಆಗ್ರಹಿಸಿದ್ದಾರೆ.