ಬೆಂಗಳೂರು/ಮಂಗಳೂರು:  ಚಿತ್ರದುರ್ಗ ರೇಣುಕಾಸ್ವಾಮಿ ಕೊಲೆ ಪ್ರಕರಣಕ್ಕೆ ಸಂಬಂಧಿಸಿ ನಟ ದರ್ಶನ್ ಪರಪ್ಪನ ಅಗ್ರಹಾರ ಸೇರಿದ್ದಾರೆ. ಈಗಾಗಲೇ ಹಲವಾರು ನಟ ನಟಿಯರು ಜೈಲಿಗೆ ಭೇಟಿ ನೀಟಿ ದರ್ಶನ್‌ ಜೊತೆ ಮಾತುಕತೆ ನಡೆಸಿದ್ದಾರೆ. ಅಲ್ಲದೇ ಕನ್ನಡ ಚಿತ್ರರಂಗದ ಕಛೇರಿಯಲ್ಲಿ ಪೂಜಾ ಹವನಾದಿಗಳನ್ನು ಕೂಡಾ ನೆರವೇರಿಸಿದ್ದಾರೆ. ಇತ್ತ ಪೂಜೆ ಹೋಮಗಳನ್ನು ಮಾಡುವ ಮೂಲಕ ದರ್ಶನ್‌ಗೆ ಬಂದಿರುವ ಸಂಕಷ್ಟ ನಿವಾರಣೆ ಮಾಡುವಂತೆ ಪತ್ನಿ ವಿಜಯಲಕ್ಷ್ಮೀ ದೇವರ ಮೊರೆ ಹೋಗಿದ್ದಾರೆ. ಆದ್ರೆ ದರ್ಶನ್ ಬಿಡುಗಡೆ ಭಾಗ್ಯ ಸಿಗುತ್ತೋ ಇಲ್ಲವೋ ಅನ್ನುವುದು ಕಾದು ನೋಡಬೇಕಿದೆ.

ಅಲ್ಲದೇ ದರ್ಶನ್ ವಿರುದ್ಧ ಪೊಲೀಸರ ಸಾಕ್ಷ್ಯಾಧಾರಗಳನ್ನು ಬಲ ಪಡಿಸಿದ್ದಾರೆ.  ರೇಣುಕಾಸ್ವಾಮಿ ಕೊಲೆ ಎ2 ಆಗಿದ್ದ ನಟ ದರ್ಶನ್​ರನ್ನು ಪೊಲೀಸರು ಎ1 ಮಾಡಿ ಚಾರ್ಜ್​ಶೀಟ್ ಸಲ್ಲಿಸೋಕೆ ನಿರ್ಧರಿಸಿದ್ದಾರೆ. ರೇಣುಕಾಸ್ವಾಮಿಯನ್ನ ಕಿಡ್ನಾಪ್ ಮಾಡುವುದರಿಂದ ಹಿಡಿದು, ಹತ್ಯೆ ಮಾಡಿ ಸಾಕ್ಷ್ಯನಾಶಕ್ಕೆ ಯತ್ನಿಸೋವರೆಗೆ ಎಲ್ಲಾ ಕೃತ್ಯಗಳು ಸಾಬೀತಾಗಿದ್ದು, ದರ್ಶನ್ ಗ್ಯಂಆಗ್‌ ಗೆ ಇದು ದೊಡ್ಡ ಸಂಕಷ್ಟವೇ ಆಗಿದೆ. ಈ ಮಧ್ಯೆ ಸಿಎಫ್‌ಎಸ್‌ಎಲ್‌ ರಿಪೋರ್ಟ್‌ ಕೂಡಾ ಪೊಲೀಸರ ಕೈ ಸೇರಿದ್ದು, ಹಲವು ಅಂಶಗಳು ರಿವೀಲ್ ಆಗಿವೆ.

ಫೋಸ್ಟ್​​ ಮಾರ್ಟಂ, ಎಫ್​ಎಸ್​​ಎಲ್, ಸಿಸಿಟಿವಿ, ಕಾಲ್​ ಡಿಟೇಲ್ಸ್, ಸಾಂದರ್ಭಿಕ ಸಾಕ್ಷ್ಯಗಳು ಡಿ ಗ್ಯಾಂಗ್​ ಕೃತ್ಯದತ್ತ ಬೊಟ್ಟು ಮಾಡಿದ್ದು ಸಂಕಷ್ಟದ ಸುರುಳಿ ಸುತ್ತಿದೆ. ರೇಣುಕಾಸ್ವಾಮಿ ಕೊಲೆ ಪ್ರಕರಣ ಸಂಬಂಧ ಸಿಎಫ್‌ಎಸ್‌ಎಲ್ ರಿಪೋರ್ಟ್ ತನಿಖಾಧಿಕಾರಿಗಳ ಕೈ ಸೇರಿದ್ದು, ದರ್ಶನ್, ಪವಿತ್ರಗೌಡ ಸೇರಿ ಡೆವಿಲ್ ಗ್ಯಾಂಗ್‌ನ ಮೊಬೈಲ್ ರಿಟ್ರೀವ್‌ನಲ್ಲಿ ಮಹತ್ವದ ಅಂಶಗಳು ಪತ್ತೆಯಾಗಿವೆ. ಹೈದ್ರಾಬಾದ್‌ನಲ್ಲಿರೋ ಕೇಂದ್ರಿಯ ವಿಧಿವಿಜ್ಞಾನ ಪ್ರಯೋಗಾಯಲಕ್ಕೆ ಹಲವು ಟೆಕ್ನಿಕಲ್ ಎವಿಡೆನ್ಸ್‌ಗಳನ್ನು ಪೊಲೀಸರು ಕಳಿಸಿಕೊಟ್ಟಿದ್ದರು. ಮೊಬೈಲ್, ಕೆಲ ಸಿಸಿಟಿವಿ ಡಿವಿಆರ್‌ಗಳನ್ನು ರಿಟ್ರೀವ್ ಮಾಡಲು ತನಿಖಾ ತಂಡ ಕಳುಹಿಸಿ ಕೊಟ್ಟಿತ್ತು. ಇದೀಗ ದರ್ಶನ್, ಪವಿತ್ರ ಗೌಡ ಸೇರಿ 13 ಆರೋಪಿಗಳ ಮೊಬೈಲ್ ರಿಟ್ರೀವ್‌ ಮಾಡಲಾಗಿದೆ. ಎಲ್ಲಾ 17 ಕೊಲೆ ಆರೋಪಿಗಳ ವಾಟ್ಸ್‌ ಆ್ಯಪ್‌ ಚಾಟಿಂಗ್‌ನೆಲ್ಲಾ ರಿಟ್ರೀವ್ ಮಾಡಲಾಗಿದೆ. ಇದೀಗ ಸಿಎಸ್‌ಎಫ್ಎಲ್ ರಿಟ್ರೀವ್ ಮಾಡಿರೋ ಶೇಕಡ 100ರಷ್ಟು ಟೆಕ್ನಿಕಲ್ ಎವಿಡೆನ್ಸ್‌ಗಳು ತನಿಖಾಧಿಕಾರಿಗಳ ಕೈ ಸೇರಿದೆ. CFSL ನಿಂದ ಬಂದಿರೋ ವರದಿಯನ್ನ ತನಿಖಾ ತಂಡ ಪರಿಶೀಲನೆ ನಡೆಸುತ್ತಿದೆ. ಈಗಾಗಲೇ ಮರಣೋತ್ತರ ಪರೀಕ್ಷೆ ವರದಿ ಹಾಗೂ ಎಫ್‌ಎಸ್‌ಎಲ್ ವರದಿ ಎರಡೂ ತಾಳೆ ಆಗಿದೆ. ರೇಣುಕಾಸ್ವಾಮಿಗೆ ಗಂಭೀರ ಹಲ್ಲೆ ಮಾಡಲಾಗಿದೆ. ಅಲ್ಲದೇ ಕರೆಂಟ್ ಶಾಕ್‌ನಿಂದ ಮೆದುಳಿನಲ್ಲಿ ತೀವ್ರ ರಕ್ತಸ್ರಾವವಾಗಿ ಸಾವನ್ನಪ್ಪಿರೋದಾಗಿ ವರದಿ ಬಂದಿದೆ. ಇದರ ಜೊತೆಗೆ ಹತ್ಯೆಗೂ ಮುನ್ನ ಮತ್ತು ಕೊಲೆಯ ನಂತರ ಆರೋಪಿಗಳು ಒಬ್ಬರಿಗೊಬ್ಬರು ಮಾತನಾಡಿಕೊಂಡಿರೋದು ಸಿಎಫ್ಎಸ್‌ಎಲ್ ವರದಿಯಲ್ಲಿ ಬಹಿರಂಗವಾಗಿದೆ. ಸಿ.ಡಿ.ಆರ್ ಅನಾಲಿಸಿಸ್‌ಲ್ಲಿ 17 ಆರೋಪಿಗಳು ಪರಸ್ಪರ ಮಾತಾಡಿರೋದು ಕನ್ಫರ್ಮ್ ಆಗಿದೆ. ಸಮಾನ ಉದ್ದೇಶದಿಂದ ಪದೇ ಪದೇ ಒಬ್ಬರಿಗೊಬ್ಬರು ಕರೆ ಮಾಡಿರೋದು ದೃಢಪಟ್ಟಿದೆ.

ಎಲ್ಲಾ ಆರೋಪಿಗಳ ಮೊಬೈಲ್‌ನಲ್ಲಿ ಚಾಟಿಂಗ್‌ ಇಂಟರ್ ಎಕ್ಸ್‌ಚೇಂಜ್ ಆಗಿದೆ. ಎಲ್ಲಾ ಚಾಟಿಂಗ್‌ಗಳನ್ನು ಮಿರರ್ ಇಮೇಜ್‌ ಮಾಡುವ ಕಾರ್ಯವನ್ನು ಮಾಡಿರುವ ವರದಿ ಪೊಲೀಸರ ಕೈ ಸೇರಿದೆ. ಇದೀಗ ವಾಟ್ಸ್‌ಆ್ಯಪ್ ಚಾಟ್ ಹಾಗೂ ಸಿಸಿಟಿವಿ ದೃಶ್ಯಾವಳಿಗಳು ಕೇಸ್‌ಗೆ ಪ್ರಮುಖ ಸಾಕ್ಷ್ಯ ಆಗೋದು ಪಕ್ಕಾ ಆಗಿದೆ. ತನಿಖೆ ವೇಳೆ ಸಿಕ್ಕಿರುವ ಎಲ್ಲಾ ಸಾಕ್ಷ್ಯಗಳನ್ನು ಲೆಕ್ಕಾಚಾರ ಮಾಡಿದ್ರೆ, ಈ ಹತ್ಯೆ ಆಕಸ್ಮಿಕ ಅಲ್ಲ ಅನ್ನೋದು ಗೊತ್ತಾಗುತ್ತೆ. ಒಟ್ಟಾರೆ, ನಟ ದರ್ಶನ್ ಹಾಗೂ ಗ್ಯಾಂಗ್ ಪರಿಸ್ಥಿತಿ ಮಾಡಿದ್ದುಣ್ಣೋ ಮಹರಾಯ ಎನ್ನುವಂತಾಗಿದೆ.