ಮಂಗಳೂರು/ ಮುಂಬೈ : ‘ರತನ್ ಟಾಟಾ’ ಈ ಹೆಸರು ಉದ್ಯಮ ಕ್ಷೇತ್ರದಲ್ಲಿ ಜನಜನಿತ. ಅವರ ಸರಳತೆ, ಸಾಧನೆ ಎಲ್ಲವೂ ಸ್ಫೂರ್ತಿದಾಯಕ. ಆದರೆ, ನಿನ್ನೆ(ಅ.9) ಅವರು ಇಹಲೋಕ ತ್ಯಜಿಸಿದ್ದಾರೆ. ಅವರ ನಿಧನಕ್ಕೆ ಭಾರತ ಮಾತ್ರವಲ್ಲದೇ ವಿದೇಶದ ಗಣ್ಯರು ಕಂಬನಿ ಮಿಡಿದಿದ್ದಾರೆ. ರಾಜಕಾರಣಿಗಳು, ಚಿತ್ರರಂಗದ ಗಣ್ಯರು, ಉದ್ಯಮಿಗಳು ಸಂತಾಪ ಸೂಚಿಸಿದ್ದಾರೆ.

ಸಾಕಿ, ಸಲಹಿದ ಅಜ್ಜಿ :

1937ರ ಡಿಸೆಂಬರ್ 28ರಂದು ರತನ್ ಟಾಟಾ ಆಗಿನ ಬ್ರಿಟಿಷ್ ಇಂಡಿಯಾದಲ್ಲಿ ಬಾಂಬೆಯಲ್ಲಿ (ಈಗಿನ ಮುಂಬೈ) ಜನಿಸಿದರು. ತಂದೆ, ನಾವಲ್ ಟಾಟಾ ಹಾಗೂ ತಾಯಿ ಸೂನಿ ಟಾಟಾ. ರತನ್ ಟಾಟಾ ಅವರು 10 ವರ್ಷ ವಯಸ್ಸಿನವರಾಗಿದ್ದಾಗ ಅವರ ತಂದೆ – ತಾಯಿ ವಿಚ್ಛೇದನ ಪಡೆದುಕೊಂಡರು. ಆಗ, ಮಗುವನ್ನು ಯಾರು ನೋಡಿಕೊಳ್ಳಬೇಕು ಎಂಬ ಪ್ರಶ್ನೆ ಎದ್ದಾಗ ಅವರನ್ನು ಟಾಟಾ ಫ್ಯಾಮಿಲಿಯದ್ದೇ ಆದ ಜೆಎನ್ ಪೆಟಿಟ್ ಪಾರ್ಸಿ ಅನಾಥಾಲಯಕ್ಕೆ ಕರೆದೊಯ್ದು ಬಿಟ್ಟಿದ್ದರು ತಂದೆ – ತಾಯಿ.

ಈ ವಿಚಾರ ತಿಳಿದ ರತನ್ ಟಾಟಾ ಅಜ್ಜಿ, ನವಾಜ್ ಬಾಯಿ ಟಾಟಾ ಅವರು ರತನ್ ಟಾಟಾ ಅವರು ಕಾನೂನಾತ್ಮಕವಾಗಿ ದತ್ತು ಪಡೆದರು. ಅಷ್ಟರಲ್ಲಾಗಲೇ ರತನ್ ಟಾಟಾ ಅವರ ತಂದೆ ನಾವಲ್ ಟಾಟಾ ಬೇರೊಂದು ಮದುವೆಯಾಗಿದ್ದರಲ್ಲದೆ, ಅವರಿಗೆ ನೊಯೆಲ್ ಟಾಟಾ ಎಂಬ ಮತ್ತೊಬ್ಬ ಮಗ ಜನಿಸಿದ್ದ. ಹಾಗಾಗಿ, ಅನಾಥಾಲಯದಿಂದ ತನ್ನ ತಂದೆ, ತಾತ ಇದ್ದ ಮನೆಗೆ ಹಿಂದಿರುಗಿದ ರತನ್ ಟಾಟಾ, ಅಲ್ಲಿ ತಮ್ಮ ಮಲಸಹೋದರ ನೋಯೆಲ್ ಟಾಟಾ (ರತನ್ ಟಾಟಾರ ಮಲತಾಯಿ ಮಗ) ಅವರೊಂದಿಗೆ ಬೆಳೆದರು.

ಮುಂಬೈನ ಚಾಂಪಿಯನ್ ಸ್ಕೂಲ್, ಕ್ಯಾಥೆಡ್ರಲ್ ಆ್ಯಂಡ್ ಜಾನ್ ಕೊನೂನ್ ಸ್ಕೂಲ್, ಶಿಮ್ಲಾದಲ್ಲಿರುವ ಬಿಷಬ್ ಕಾಟನ್ ಸ್ಕೂಲ್, ನ್ಯೂಯಾರ್ಕ್ ನಗರದಲ್ಲಿರುವ ರಿವರ್ಡಬಲ್ ಕಂಟ್ರಿ ಸ್ಕೂಲ್ ನಲ್ಲಿ ಶಿಕ್ಷಣ ಪಡೆದರು. ಆನಂತರ, ಹಾರ್ಡರ್ಡ್ ಬ್ಯುಸಿನೆಸ್ ಸ್ಕೂಲ್ ಹಾಗೂ ಕಾರ್ನೆಲ್ ಯೂನಿವರ್ಸಿಟಿಯಲ್ಲಿ ವಿದ್ಯಾಭ್ಯಾಸ ಮಾಡಿದರು.

ಸಮೂಹ ಸಂಸ್ಥೆಗಳ ಚುಕ್ಕಾಣಿ ಹಿಡಿದ ಟಾಟಾ :

1991ರಲ್ಲಿ ರತನ್ ಟಾಟಾ ಅವರು ಟಾಟಾ ಸಮೂಹ ಸಂಸ್ಥೆಗಳ ಮುಖ್ಯಸ್ಥರಾಗಿ ಅಧಿಕಾರ ಸ್ವೀಕರಿಸಿದರು. 1963ರಲ್ಲೇ ಅವರು ಟಾಟಾ ಸಮೂಹ ಸಂಸ್ಥೆಗಳ ನಾನಾ ಕಂಪನಿಗಳ ಆಡಳಿತ ಮಂಡಳಿಗಳ ಮುಖ್ಯಸ್ಥರಾಗಿ ಆ ಸಂಸ್ಥೆಗಳನ್ನು ಯಶಸ್ವಿಯಾಗಿ ನಿರ್ವಹಿಸಿದ್ದಾರೆ. ಅದೇ ಅನುಭವದ ಮೇರೆಗೆ ಸಮೂಹ ಸಂಸ್ಥೆಗಳ ಚುಕ್ಕಾಣಿ ಹಿಡಿದರು.

ಉತ್ತರಾಧಿಕಾರಿ ಯಾರು?

2017ರಲ್ಲಿ ರತನ್ ಟಾಟಾ, ಎನ್. ಚಂದ್ರಶೇಖರ್‌ ಅವರಿಗೆ ಜವಾಬ್ದಾರಿಯನ್ನು ವಹಿಸಿ ನಿವೃತ್ತರಾದರು. ಟಾಟಾ ಸಮೂಹ ಸಂಸ್ಥೆಯನ್ನು ಒಂದು ದೊಡ್ಡ ಮೈಲಿಗಲ್ಲಾಗಿ ಸ್ಥಾಪಿಸಿದ್ದ ಟಾಟಾ ಇನ್ನಿಲ್ಲ ಎಂಬುದೇ ಅರಗಿಸಿಕೊಳ್ಳಲಾಗದ ಸತ್ತ. ಆದರೆ, ಇದರೊಂದಿಗೆ ಮತ್ತೊಂದು ದೊಡ್ಡ ಪ್ರಶ್ನೆ ಹುಟ್ಟಿದೆ. ರತನ್ ಟಾಟಾ ಉತ್ತರಾಧಿಕಾರಿ ಯಾರು? ಎಂಬುದು.

ರತನ್ ಟಾಟಾ ಅವಿವಾಹಿತರಾಗಿದ್ದರು. ಹಾಗಾಗಿಯೇ ಈ ಪ್ರಶ್ನೆಗೆ ಉತ್ತರಕ್ಕಾಗಿ ತಡಕಾಟ ಸಾಮಾನ್ಯ ಸಂಗತಿ. ಈ ಪ್ರಶ್ನೆಗೆ ಉತ್ತರವಾಗಿ ಮೊದಲು ಕೇಳಿ ಬರುವ ಹೆಸರು ನೋಯಲ್ ಟಾಟಾ. ನೋಯಲ್ ಟಾಟಾ ಬೇರ್ಯಾರು ಅಲ್ಲ. ರತನ್ ಟಾಟಾ ತಂದೆಯ ಎರಡನೇ ಪತ್ನಿ ಸಿಮೋನ್ ಅವರ ಪುತ್ರ.

ಟಾಟಾ ಕುಟುಂಬದ ಉದ್ಯಮ ಮುನ್ನಡೆಸುವಲ್ಲಿ ಕೌಟುಂಬಿಕವಾಗಿ ನೋಯಲ್ ಟಾಟಾ ಹೆಸರು ಮುಂಚೂಣಿಯಲ್ಲಿದೆ. ನೋಯಲ್ ಟಾಟಾ ಹಿರಿಯ ಪುತ್ರಿ ಲಿಯಾ ಟಾಟಾ ಹೆಸರು ಸಹ ಈ ಸಾಲಿನಲ್ಲಿದೆ. ಸ್ಪೇನ್‌ನಲ್ಲಿ ಮಾರ್ಕೆಟಿಂಗ್‌ನಲ್ಲಿ ಸ್ನಾತಕೋತ್ತರ ಪದವಿ ಪಡೆದಿರುವ ಲಿಯಾ ಸದ್ಯ ಟಾಟಾ ಸಮೂಹದ ತಾಜ್ ಹೋಟೆಲ್, ರೆಸಾರ್ಟ್‌ಗಳನ್ನು ನೋಡಿಕೊಳ್ಳುತ್ತಿದ್ದಾರೆ.

ಮಾಯಾ ಟಾಟಾ ಸಾರಥ್ಯ: 

ಈ ಉತ್ತರಾಧಿಕಾರತ್ವದ ವಿಚಾರದಲ್ಲಿ ಬಲವಾಗಿ ಕೇಳಿ ಬರುತ್ತಿರುವ ಹೆಸರು ನೋಯಲ್ ಟಾಟಾ ಕಿರಿಯ ಪುತ್ರಿ ಮಾಯಾ ಟಾಟಾ ಅವರದು. ಬೇಯಸ್ ಬಿಸಿನೆಸ್ ಸ್ಕೂಲ್ ಮತ್ತು ವಾರ್ವಿಕ್ ವಿಶ್ವವಿದ್ಯಾಲಯದಲ್ಲಿ ವ್ಯಾಸಂಗ ಮಾಡಿದ್ದಾರೆ. 34 ವರ್ಷದ ಟಾಟಾ ಆಪರ್ಚುನಿಟೀಸ್ ಫಂಡ್ ಮತ್ತು ಟಾಟಾ ಡಿಜಿಟಲ್‌ನಲ್ಲಿ ಪ್ರಮುಖ ಹುದ್ದೆಯಲ್ಲಿದ್ದಾರೆ.

ಇದನ್ನೂ ಓದಿ : ರತನ್ ಟಾಟಾ ಮದುವೆ ಆಗದೇ ಇರೋದಕ್ಕೆ ಕಾರಣ ಏನು ಗೊತ್ತಾ?

ಟಾಟಾ ನ್ಯೂ ಅಪ್ಲಿಕೇಶನ್‌ನಲ್ಲಿಯೂ ಮಾಯಾ ಟಾಟಾ ಕಾರ್ಯ ನಿರ್ವಹಣೆ ಮಾಡಿದ್ದಾರೆ. ಇನ್ನು ನೋಯಲ್ ಪುತ್ರ ನೆವಿಲ್ಲೆ ಟಾಟಾ, ಟಾಟಾ ಕುಟುಂಬ ಒಡೆತನದ ಹಲವು ವ್ಯವಹಾರಗಳನ್ನು ನೋಡಿಕೊಳ್ಳುತ್ತಿದ್ದಾರೆ. ಟಾಟಾ ಟ್ರೆಂಡ್ ಅಡಿಯಲ್ಲಿರುವ ಸ್ಟಾರ್ ಬಜಾರ್ ಅನ್ನು ನಿರ್ವಹಣೆ ಮಾಡುತ್ತಿದ್ದಾರೆ.