ಮಂಗಳೂರು ಅಂತರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಎ.ಸಿ.ಐ ಆರೋಗ್ಯ ಮಾನ್ಯತೆ..!
ಮಂಗಳೂರು: ಸುರಕ್ಷಿತ ಪ್ರಯಾಣಕ್ಕಾಗಿ ಎ.ಎಚ್‍.ಎ ಕಾರ್ಯಕ್ರಮದಡಿ ಎ.ಸಿ.ಐ ಮೌಲ್ಯಮಾಪನ ಪ್ರಕ್ರಿಯೆ ನಡೆಸಿರುವ 118 ಪರಿಶೀಲನಾ ಅಂಕಗಳ ಆಧಾರಗಳ ಮೇಲೆ ಇದೀಗ ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಏರ್ ಪೋರ್ಟ್ ಕೌನ್ಸಿಲ್ ಇಂಟರ್ ನ್ಯಾಷನಲ್‍ನಿಂದ ಆರೋಗ್ಯ ಮಾನ್ಯತೆ ಲಭಿಸಿದೆ.
ಇದು ಮುಂದಿನ ಒಂದು ವರ್ಷ ಕಾಲ ಮಾನ್ಯವಾಗಿರುತ್ತದೆ. ಕೊರೊನಾ ಸೋಂಕು ಹರಡುವಿಕೆ ಹಾಗೂ ನಿಯಂತ್ರಣ ಸಾಧಿಸುವಲ್ಲಿ ಆರೋಗ್ಯ ಸುರಕ್ಷತಾ ಮಾನದಂಡಗಳನ್ನು ಸರಿಯಾಗಿ ಅನುಸರಿಸಿದ ಹಿನ್ನೆಲೆ ಮಾನ್ಯತೆ ನೀಡಲಾಗಿದೆ.
ನಿಲ್ದಾಣದ ನಿರ್ಗಮನ, ಆಗಮನ ದ್ವಾರ, ಎಲ್ಲಾ ಟರ್ಮಿನಲ್ ಪ್ರದೇಶಗಳಲ್ಲಿನ ಪ್ರಯಾಣಿಕರು ಮತ್ತು ಸಿಬ್ಬಂದಿಗೆ ವರ್ಗಾವಣೆ, ಸಾರಿಗೆ ಸೇವೆಗಳು, ಆಹಾರ ಮತ್ತು ಪಾನೀಯ ಸೇವೆಗಳು, ಎಸ್ಕಲೇಟರ್‍ಗಳು ಮತ್ತು ಎಲಿವೇಟರ್‍ಗಳು, ವಿಶ್ರಾಂತಿ ಕೋಣೆಗಳು, ಸೌಲಭ್ಯಗಳು ಮತ್ತು ಬ್ಯಾಗೇಜ್ ಕ್ಲೈಮ್ ಪ್ರದೇಶಗಳಲ್ಲಿ ಕೈಗೊಂಡ ಆರೋಗ್ಯ ಮತ್ತು ಸುರಕ್ಷತಾ ಕ್ರಮಗಳನ್ನು ಪರಿಶೀಲಿಸಿ ಮಾನ್ಯತೆ ನೀಡಲಾಗಿದೆ.
