ಮದುವೆಯಾಗಲ್ಲ ಎಂದು ಹೇಳಿದ್ದ ಪ್ರಿಯಕರನ ಮೇಲೆ ಯುವತಿಯೊಬ್ಬಳು ಬಿಸಿನೀರು ಚೆಲ್ಲಿ ಆತನ ಮುಖಕ್ಕೆ ಬಾಟಲಿಯಿಂದ ಹೊಡೆದು ಪರಾರಿಯಾಗಿರುವ ಘಟನೆ ಬೆಂಗಳೂರಿನ ಚಾಮರಾಜ ಪೇಟೆಯಲ್ಲಿ ತಡವಾಗಿ ಬೆಳಕಿಗೆ ಬಂದಿದೆ.

ಬೆಂಗಳೂರು :ಮದುವೆಯಾಗಲ್ಲ ಎಂದು ಹೇಳಿದ್ದ ಪ್ರಿಯಕರನ ಮೇಲೆ ಯುವತಿಯೊಬ್ಬಳು ಬಿಸಿನೀರು ಚೆಲ್ಲಿ ಆತನ ಮುಖಕ್ಕೆ ಬಾಟಲಿಯಿಂದ ಹೊಡೆದು ಪರಾರಿಯಾಗಿರುವ ಘಟನೆ ಬೆಂಗಳೂರಿನ ಚಾಮರಾಜ ಪೇಟೆಯಲ್ಲಿ ತಡವಾಗಿ ಬೆಳಕಿಗೆ ಬಂದಿದೆ.

ಇವರಿಬ್ಬರೂ ಎರಡು ವರ್ಷಗಳಿಂದ ಪ್ರೀತಿಸುತ್ತಿದ್ದರು. ಆದರೆ, ಆ ಯುವತಿಗೆ ಎರಡು ವರ್ಷಗಳ ಹಿಂದೆಯೇ ಮದುವೆಯಾಗಿತ್ತು ಎಂದು ಹೇಳಲಾಗಿದೆ.

ಇದು ಗೊತ್ತಾಗಿ, ಆ ಯುವಕ ಆಕೆಯನ್ನು ಮದುವೆಯಾಗಲು ನಿರಾಕರಿಸಿದ್ದ. ಇದರಿಂದಾಗಿ ಆತನ ಮೇಲೆ ತುಂಬಾ ಸಿಟ್ಟಾಗಿದ್ದ ಯುವತಿ, ಆತನ ಮೇಲೆ ಬಿಸಿನೀರು ಚೆಲ್ಲಿದ್ದಾಳೆಂದು ಹೇಳಲಾಗಿದೆ.

ದಾಳಿಗೊಳಗಾದ ದುರ್ದೈವಿ ಕಲಬುರಗಿಯ ವಿಜಯಶಂಕರ ಆರ್ಯ, ಆರೋಪಿಯ ಹೆಸರು ಅಫ್ಜಲ್ಪುರ ದೇಸಾಯಿ ಕಲ್ಲೂರಿನ ಜ್ಯೋತಿ ದೊಡ್ಡಮನಿ.

ಇವರಿಬ್ಬರೂ ಬೆಂಗಳೂರಿಗೆ ಬಂದು ಬೇರೆ ಬೇರೆ ಸಂಸ್ಥೆಗಳಲ್ಲಿ ಸೇರಿ ಕೆಲಸ ಮಾಡುತ್ತಿದ್ದರು. ಇಬ್ಬರಿಗೂ ಈ ಮೊದಲು ಪರಿಚಯವಿರಲಿಲ್ಲ.

ಬೆಂಗಳೂರಿನಲ್ಲೇ ಇಬ್ಬರಿಗೂ ಪರಿಚಯವಾಗಿ ಪ್ರೀತಿ ಬೆಳೆದಿದೆ. ಎರಡು ವರ್ಷಗಳಿಂದ ಪ್ರೀತಿಸುತ್ತಿದ್ದ ಇವರು ಒಬ್ಬರನ್ನೊಬ್ಬರು ಸದ್ಯದಲ್ಲೇ ಮದುವೆಯಾಗುವ ಬಗ್ಗೆ ನಿರ್ಧರಿಸಿದ್ದರು.

ಜ್ಯೋತಿ ವಾಸ್ತವ್ಯಕ್ಕೆ ಸರಿಯಾದ ವ್ಯವಸ್ಥೆ ಇಲ್ಲದ್ದರಿಂದಾಗಿ ತನ್ನ ರೂಮನ್ನೇ ಆಕೆಗೆ ಬಿಟ್ಟುಕೊಟ್ಟಿದ್ದ ವಿಜಯಶಂಕರ, ತಾನು ಸ್ನೇಹಿತನ ರೂಮ್ ನಲ್ಲಿ ಹೋಗಿ ವಾಸ್ತವ್ಯ ಹೂಡಿದ್ದ.

ಇತ್ತೀಚೆಗೆ, ಇವರಿಬ್ಬರ ಲವ್ ಸ್ಟೋರಿಯಲ್ಲಿ ಟ್ವಿಸ್ಟ್ ಸಿಕ್ಕಿತ್ತು. ಜ್ಯೋತಿಗೆ ಮೊದಲೇ ಮದುವೆಯಾಗಿದ್ದು ಆತನಿಗೆ ಗೊತ್ತಾಗಿದೆ.

ಇದರಿಂದ ಆಕೆಯನ್ನು ಆತ ದೂರವಿಡಲು ಪ್ರಯತ್ನಿಸಿದ್ದಾನೆ. ಆಕೆಗೆ ಅನುಮಾನ ಬಂದಿದ್ದು ಆತನನ್ನು ಕೇಳಿದ್ದಾಳೆ.

ಆತ ಮೊದಲುಬಾಯಿಬಿಟ್ಟಿಲ್ಲ. ಆನಂತರ, ಬಾಯಿಬಿಟ್ಟಿದ್ದಾನೆ.”ನಿನಗೀಗಾಗಲೇ ಮದುವೆಯಾಗಿದೆ.

ಹಾಗಾಗಿ, ನಾವಿಬ್ಬರೂ ಮದುವೆಯಾಗುವುದು ಬೇಡ. ಈ ಸಂಬಂಧವನ್ನು ಇಲ್ಲಿಗೇ ಮುಗಿಸೋಣ” ಎಂದು ಹುಡುಗ ಹೇಳಿದ್ದನೆಂದು ಮೂಲಗಳು ತಿಳಿಸಿವೆ.

ಆದರೆ, ಇದಕ್ಕೆ ಜ್ಯೋತಿ ಒಪ್ಪಿರಲಿಲ್ಲ. ಇದೇ ವಿಚಾರಕ್ಕೆ ಅವರಿಬ್ಬರ ನಡುವೆ ಜಗಳಗಾಗುತ್ತಿದ್ದವು.

ಈ ಮಧ್ಯೆ ಆತನನ್ನು ಮಾತಾಡೋಣ ಬಾ ಎಂದು ಆಕೆಯು ಆತನನ್ನು ಕರೆದಿದ್ದಳು.

ಇಬ್ಬರೂ ಬಹುವಾಗಿ ಚರ್ಚಿಸಿದರೂ ಒಂದು ನಿರ್ಧಾರಕ್ಕೆ ಬರಲಾಗಲಿಲ್ಲ. ವಿಜಯಶಂಕರ್ ತಾನು ಮದುವೆಯಾಗೋದೇ ಇಲ್ಲ ಎಂದು ಹಠ ಹಿಡಿದಿದ್ದ.

ಇದರಿಂದ ಒಳಗೊಳಗೇ ಕುದ್ದು ಹೋಗಿದ್ದ ಜ್ಯೋತಿ, ಉಪಾಯವಾಗಿ ಆತನನ್ನು ರೂಮಿನಲ್ಲೇ ಇರುವಂತೆ ಮಾಡಿ, ಬಿಸಿನೀರು ಕಾಯಿಸಿ ತಂದು ಆತನ ಮೇಲೆ ಸುರಿದಿದ್ದಾಳೆ.

ಇದರಿಂದ ಆತ ಕಿರುಚಾಡಿ ಒದ್ದಾಡುತ್ತಿರುವಾಗಲೇ, ಪಕ್ಕದಲ್ಲಿದ್ದ ಬಿಯರ್ ಬಾಟಲಿಯಿಂದ ಆತನ ಮುಖಕ್ಕೆ ಹೊಡೆದಿದ್ದಾಳೆ.

ಇದರಿಂದ ಮತ್ತಷ್ಟು ಗಾಯಗೊಂಡ ಆತ ಚೀರಾಡುತ್ತಾ ರಕ್ತ ಸೋರಿಸಿಕೊಂಡು ಬಿದ್ದು ಒದ್ದಾಡುತ್ತಿದ್ದಾಗ, ಆಕೆ ಬೇಗನೇ ರೂಮನ್ನು ಬಾಗಿಲು ಹಾಕಿಕೊಂಡು ಲಾಕ್ ಮಾಡಿ ಅಲ್ಲಿಂದ ಪೇರಿ ಕಿತ್ತಿದ್ದಾಳೆ.

ಇತ್ತ, ಆತನ ಕಿರುಚಾಟವು ರೂಮಿನ ಕೆಳಗಡೆ ಇದ್ದ ಮನೆಯ ಮಾಲೀಕನ ಕಿವಿಗೆ ಬಿದ್ದಿದ್ದು, ಆತ ಓಡಿಬಂದು ಕಿಟಕಿಯಿಂದ ನೋಡಿದಾಗ ರೂಮಿನಲ್ಲಿ ವಿಜಯಶಂಕರ್ ಒದ್ದಾಡುತ್ತಿದ್ದುದು ಕಣ್ಣಿಗೆ ಬಿದ್ದಿದೆ.

ಕೂಡಲೇ ಆತನನ್ನು ಕಾಪಾಡಿ, ವಿಕ್ಟೋರಿಯಾ ಆಸ್ಪತ್ರೆಗೆ ಸೇರಿಸಿದ್ದಾನೆ. ಪೊಲೀಸರಿಗೂ ಸುದ್ದಿ ಮುಟ್ಟಿಸಿದ್ದಾನೆ.

ವೈದ್ಯರು ಹೇಳುವ ಪ್ರಕಾರ, ಆತನಿಗ ಶೇ. 50ರಿಂದ 60ರಷ್ಟು ಸುಟ್ಟಗಾಯಗಳಾಗಿವೆ. ಮುಖದ ಮೇಲಿನ ಗಾಯದಿಂದ ತೀವ್ರವಾಗಿ ರಕ್ತಸ್ರಾವವಾಗಿದ್ದೂ ಸೂಕ್ತ ಚಿಕಿತ್ಸೆ ನೀಡಲಾಗುತ್ತಿದ್ದು ಪೊಲೀಸರು ತನಿಖೆ ಕೈಗೆತ್ತಿಕೊಂಡಿದ್ದಾರೆ.